Qolóner sheberi: Kıizden jasalǵan buıymdar densaýlyqqa paıdaly
QYZYLORDA. QazAqparat - Qyzylorda qalasynyń turǵyny Aıdana Álaıdarova júnnen jasalǵan panno, bas kıimder, keýdeshe, aksessýarlar, tekemetter, syrmaqtar, ıntererde qoıýǵa arnalǵan qumyralar, qorjyndar, káde-syı sekildi buıymdardy jasap, qazaqtyń qolónerin damytyp keledi, dep habarlaıdy QazAqparat tilshisi.
Syr óńirinde ulttyq murany damytýda qolónershi úlken eńbek sińirip júr. Óziniń isin jetik biletin jannyń qolynan shyqqan kózdiń jaýyn alatyn buıymdar tutynýshylar tarapynan joǵary suranysqa ıe. Bala jasynan ulttyq ónerdiń qyr-syryna qanyq bolyp ósken Aıdana Álaıdarova qazirgi kúni el jadynan óshe bastaǵan izgi isti jalǵastyryp júrgenine qýanyshty.
«Men bul tirshilikti bala kezimnen kórip óstim. Anamnyń júndi tazalap, tekemet basqanyn talaı márte zerdemizge toqydyq. Ol ýaqytta bizge barlyǵy tańsyq kórindi. Úırenýge umtyldyq. Odan eshbir utylǵan joqpyz. Qazir sonyń jemisin jep júrmiz. Bul ónerdi ata-anamnan úırendim. Ol kisilerdiń jasaǵanyna óte qyzyǵatyn edim. Maǵan erinbeı úıretti. Qazir ulttyq qazynany kózimizdiń qarashyǵyndaı saqtap, ony jas urpaqqa úıretýge kóńil bólip kelemin. Ony el aldynda dáripteýge nazar aýdaryp júrmin», - dedi A.Álaıdarova.
Talǵamy zor kópshilik júnnen jasalǵan pannoǵa erekshe qyzyǵýshylyq bildirip jatady. Sondyqtan oǵan degen suranys ta zor. Aıdana Álaıdarova óz qolynan tabıǵı kıizden ulttyq oıynshyqtar jasaý isine de mán berip júr. Qazir jurtshylyq balalaryna osyndaı ónimderdi alyp berýge nıet tanytady. Óıtkeni, bul oıynshyqtardyń erekshelegi - ekologııalyq turǵydan taza bolyp keledi ári tabıǵı ekeni belgili. Qolónershi oıynshyqtardy jasaǵanda eshqandaı tigistiń paıdalanbaıtynyn aıtady. Bul dúnıeler tutynýshyǵa da óte qolaıly. Bir jaǵynan jylylyǵymen erekshelense, ekologııalyq tıimdiligi men salmaǵanyń jeńil bolýymen eldiń kózine túsedi.
Kıizdiń ereksheligi - temperatýrany qalypty ustaıdy, jýǵan saıyn jańarady. Qurǵaq jylý - sýyq tıgende birden-bir em. Júnnen jasalǵan buıymdar, ásirese, revmatızm, osteohondroz jáne radıkýlıtpen aýyratyn naýqastarǵa usynylatyn bolǵan.
A.Álaıdarova - 2014 jyldan beri Qazaqstan qolónershiler odaǵynyń múshesi. Qazir «SyrEtnoDızaın» qolóner ortalyǵynyń dırektory qyzmetin atqarady. Syr óńirindegi irgeli bilim ordasy - Qorqyt ata atyndaǵy Qyzylorda memlekettik ýnıversıtetinde aǵa oqytýshy retinde jastarǵa dáris berse, pedagogıka ǵylymdarynyń magıstri ataǵyn alǵan. Qolónershi ulttyq ónerdi úırenýge umtylǵan jastarmen jeke jumys jasap, olardyń shyǵarmashylyq eńbekterin arttyryp otyrady.
Bul jóninde A.Álaıdarova «Shákirtterdiń jas ereksheligine qaramaımyn. Halyqtyń qoldanbaly ónerine qyzyǵýshylyq tanytatyn jáne qolónermen shuǵyldanǵysy keletin jas sheberlerge qazirgi zamanaýı tehnologııany paıdalanyp dástúrli tabıǵı materıaldardan ónimder jasaý ádisterin úıretip júrmin», - dedi.
Byltyr qyzylordalyq qolónershi EKSPO-2017 halyqaralyq kórmesinde óz ónimderin el nazaryna usyndy. Ol jasaǵan buıymdarǵa ózge elderden kelgen meımandar tarapynan erekshe qyzyǵýshylyq bolǵan eken. Kóptegen buıymdardy sheteldikter satyp alǵan.
Qolóner sheberi óz otandastarymyzdyń da ulttyq buıymdardy satyp alýǵa yqylasy artyp kele jatqanyn aıtady. Ásirese, úı jabdyqtary, ulttyq naqyshtaǵy kıim-keshek pen aksessýarlar tutynýshylar talǵamynan shyǵyp júr. Oǵan qosa qyzdyń jasaýyna arnalǵan kórpeshe, sandyq, kebeje, qorjyn syndy buıymdar da halyqtyń qyzyǵýshylyǵyn týǵyzady.
