Qolmergen Keıki batyr súıeginiń elge oralýy sanamyzdyń jańǵyrǵanyn kórsetedi - Qýanysh Sultanov
QOSTANAI. QazAqparat- Arqalyq qalasynda «Keıki Kókembaıuly. Ómiri men óliminiń tarıhy» atty ǵylymı-təjirıbelik konferentsııa ótti, dep habarlaıdy QazAqparat tilshisi.
Basqosýǵa QR memlekettik hatshysy Gúlshara Əbdiqalyqova, QR Mədenıet jəne sport mınıstri Arystanbek Muhamedıuly, Qostanaı oblysynyń əkimi Arhımed Muhambetov, Vengrııanyń Qazaqstandaǵy elshisi Andrash Baranı, QR Parlamentiniń depýtaty Qýanysh Sultanov jəne basqa da zııaly qaýym ókilderi qatysty. Konferentsııany Qostanaı oblysy əkimi júrgizip otyrdy.
QR Memlekettik hatshysy Gúlshara Əbdiqalyqova óziniń kirispe sózinde elimizde rýhanı baǵytta júzege asyrylyp jatqan sharalardyń mańyzyna toqtaldy.
«Keıki Kókembaıuly - bolmysy bólek batyr. Halyqtyń joǵyn joqtap, ədildik pen parasattyń aq týyn kótergen babamyz ar-namysty bərinen bıik qoıǵan. Memleket basshysynyń «Rýhanı jańǵyrý: bolashaqqa baǵdar» atty baǵdarlamalyq maqalasynda tarıhtyń sabaǵynan nər alýymyz kerektegin basa aıtty. Mine, osy baǵytta qasıetti Qostanaı óńirinde birshama sharýalar atqarylýda. Oǵan bərimiz kýəmiz. Osy isterińiz jalǵasa bersin»,- degen tilek aıtty Memlekettik hatshy.
Vengrııanyń Qazaqstandaǵy elshisi Andrash Baranı Qazaqstan men Vengrııanyń tarıhı baılanysy jóninde aıtty. Elshi sózine súıensek, aldaǵy ýaqytta eldiń ǵalymdary birigip, birneshe jobanyń oryndalýyna muryndyq bolady.
QR Mədenıet jəne sport mınıstri Arystanbek Muhamedıuly Keıki batyrdyń músinin Qostanaı oblysynyń mýzeıine syıǵa tartty.
Munan soń depýt Qýanysh Sultanov baıandama jasady.
«Keıki batyr kesenesiniń týǵan jerinde boı kóterýi - elimizdiń tarıhı tulǵalarǵa degen qurmetiniń kórinisi. Erliktiń sımvoly ispettes qolmergen súıeginiń elge oralýy da sanamyzdyń jańǵyrǵany dep bilemin. Iə, qazaqtan basqa eshbir el bodandyqtyń zardabyn osynshalyq kórmegen shyǵar. Al sonaý qıyn kezeńderde bas kótergen arda tulǵalar ər óńirde boldy. Torǵaı topyraǵynan shyqqan Keıki Kókembaıulynyń azattyq jolyndaǵy erligi eshqashan umytylmaıdy. Onyń tarıh betinen óshirilmeýi de bizdiń qolymyzda»,- dedi Qýanysh Sultanov.
QR Ortalyq memlekettik murajaıynyń dırektory Nursan Əlimbaı Keıki batyrdyń basy saqtalǵan jəshikti Qostanaı oblysyna tapsyrdy. Konferentsııada belgili aqyn Serik Turǵynbekuly men Keıki Kókembaıulynyń tikeleı urpaǵy Seıtqalı Qosjanov baıandama jasady.
Batyr Jolaıuly
