Qolma-qol shetel valıýtasy jetkilikti – Ulttyq bank
«Qolma-qol shetel valıýtasyna qatysty ishki naryqtaǵy jaǵdaı qalypqa keltirildi. Halyqtyń suranysyn qanaǵattandyrý úshin qolma-qol shetel valıýtalary jetkizildi. Ekinshi deńgeıli bankterde ótimdi valıýtalyq aktıvter kólemi jetkilikti», - dedi V.Týtýshkın Májilistiń jalpy otyrysynda.
Onyń aıtýynsha, Ulttyq bank qolma-qol shetel valıýtasy naryǵynda alypsatarlyq áreketterdi boldyrmaý úshin aıyrbas pýnkteri arqyly shetel valıýtasyn satyp alý baǵamynyń satý baǵamynan aýytqý shekterin keńeıtti.
«Memleket basshysynyń ulttyq valıýtanyń ornyqtylyǵyn qamtamasyz etý, kapıtaldy áketýge jol bermeý tapsyrmasyn oryndaý úshin transshekaralyq qarjy operatsııalaryn baqylaý sharalary kúsheıtildi. Qabyldanǵan sharalarǵa baılanysty, ishki valıýta naryǵyndaǵy jaǵdaı turaqtalyp keledi. Qazirgi ýaqytta jaǵdaı suranys pen usynystyń teńgerimde ekenin kórsetedi. Sharalar kesheni aıyrbas baǵamyna jáne keıinnen ınflıatsııaǵa qysymdy tómendetip, teńgedegi aktıvterdi qoldaýǵa kómektesedi», - dedi Vıtalıı Týtýshkın.
Buǵan deıin Ulttyq bank ókili Qazaqstan úshin syrtqy ınflıatsııalyq jaǵdaı kúrdeli bolatynyn boljaǵan edi. Sonymen birge, Qazaqstanda ınflıatsııa taǵy ósedi dep boljanyp otyr.
