Qolma-qol aqshasyz tólemder 35 paıyzǵa jetkiziledi
ASTANA. QazAqparat - Qazaqstanda qolma-qol aqshasyz tólemder 35 paıyzǵa deıin jetkiziledi. Bul týraly búgin «Tsıfrlyq Qazaqstan» baǵdarlamasyn júzege asyrýǵa arnalǵan konferentsııada «Zerde» ulttyq aqparattyq-kommýnıkatsııalyq holdınginiń basqarma tóraǵasy Rýslan Eńsebaev málim etti, dep habarlaıdy QazAqparat.
«Elektrondyq saýdany damytýǵa qolaıly jaǵdaı jasaýdan eleýli nátıje kútilýde. Osy oraıda bul protseske qatysýshylar úshin salyqtyq jeńildikterdi qarastyratyn zańnamalyq ózgerister qabyldandy. Sonymen qatar, qolma-qol aqshasyz tólemderdi yntalandyrýdy damytý turǵysynda úlken jumystar atqarylady. Búginde Qazaqstanda qolma-qol aqshasyz tólemder úlesi 10 paıyzdy qurap otyr, alaıda baǵdarlama aıasynda onyń deńgeıin 35 paıyzǵa deıin jetkizýdi josparlyp otyrmyz», - dedi «Zerde» holdınginiń basqarma tóraǵasy.
Saraptamalyq agenttikter málimetterine súıensek, qolma-qol aqshadan qolma-qol emes tólem túrinde aýdarýdyń árbir paıyzy 0,04 paıyz deńgeıinde JІÓ ósimin beredi.
«Bul rette 20 paıyzdyq deńgeı Jalpy ishki ónimniń 1 paıyz ósimin qamtamasyz etedi», - dep toqtaldy ol.
Osy oraıda R. Eńsebaev bul baǵytta tıisti ınfraqurylymdy qurý, onlaın-kassalarmen jáne termınaldarmen jabdyqtaýda aýqymdy sharalar qamtylǵanyn atap ótti.
