Qolma-qol aqshamen jáne bólip tóleýge ártúrli baǵa belgilenýi múmkin

ASTANA. KAZINFORM – Qarjy naryǵyn retteý jáne damytý agenttigi qolma-qol aqshamen jáne bólip tóleýge arnalǵan ártúrli baǵany engizý ıdeıasyn qoldady. Bul týraly osy agenttiktiń tóraǵasy Mádına Ábilqasymova aıtty.

Búgin Parlament palatalarynyń birlesken otyrysynyń aldynda tilshiler agenttik basshysynan taýarlarǵa eki baǵany mindetti túrde kórsetip engizý bastamasy týraly surady. Óıtkeni kóp jaǵdaıda bólip tóleý degen jeleýmen adamdarǵa paıyzdyq ústemesi bar nesıe berilip jatady.

Óz kezeginde Mádına Ábilqasymova taýarlardyń qunyn bólip tóleýdi rásimdegen kezde, ashyq tetikterdi engizý mańyzdy ekenin atap ótti.

- Jalpy, agenttik retinde biz muny qoldaımyz. Negizi, taýar baǵasyn belgileý quzyretimizge kirmeıdi. Biraq, taýar satatyn jeliler taýarlardyń qunyn bólip tóleý tetigi arqyly óteýdi usynyp jatqandyqtan, osy bólip tóleý bankter arqyly rásimdelgendikten, bul jerde artyq paıyz ústemesiniń eseptelmegeni eskerilýi tıis. Al eger osy saýda tetigi kádimgi nesıe sharttaryna uqsas bolsa, onda osynyń bári nesıe berýdiń sharttary retinde qaralýy kerek. Qaryz alýshy belgili bir ónimdi nemese taýardy bólip tóleý arqyly alsa, tólemi úshin onyń artyq ústemesi qansha ekeni týraly habardar bolýy tıis. Atap aıtqanda, taýardy bólip tóleýsiz alǵan bolsa, bir baǵa kórsetilýi qajet, al bólip tóleý arqyly alsa, onda qansha qosymsha ústemesi bar ekeni kórinýi kerek. Sonymen qatar, nesıe alǵan kezde de nomınaldy túrde onyń paıyzynyń qansha ekenin, aqshalaı túrde artyq tóleminiń qansha ekenin bilýi tıis, – dedi agenttik basshysy.

Onyń paıymynsha, baǵa qalyptastyrýda saralanǵan deńgeıdi engizý tutynýshylardyń quqyqtaryn qorǵaýdy qamtamasyz etedi.

Budan buryn habarlanǵandaı, Qarjy naryǵyn retteý jáne damytý agenttiginiń tóraǵasy Mádına Ábilqasymova nesıesi boıynsha problemasy bar adamdardyń sanyn naqtylady.