Qolma-qol aqshamen esep aıyrysýdan tolyqtaı bas tartý kerek - sarapshy

ASTANA. KAZINFORM – Ekonomıst, táýelsiz sarapshy Erlan Karımov Kazinform agenttiginiń BIZDIÑ ORTA podkasynda Ulttyq qordy saqtaý men bıýdjet tapshylyǵy máselesin sheshýge qatysty pikir aıtty.

- Ulttyq qordy bolashaqqa, urpaqqa qaldyrýymyz kerek. Óıtkeni, zaman qıyndap barady. Ásirese, klımattyń ózgerýine nazar aýdarǵan jón. Halyqaralyq uıymdardyń zertteýine qarasaq, Qazaqstanda sý tapshylyǵy máselesi ózekti bolady. Sebebi kórshi elderden ózen sýyn alyp otyrmyz. Bul baǵytta bizge qomaqty ınvestıtsııa kerek, ıaǵnı jerasty sýyn jáne basqa da tehnologııalar arqyly sý tartý jobalaryn iske asyrýǵa qomaqty qarjy salý qajet, - dedi E.Karımov.

Onyń paıymynsha, bıýdjet tapshylyǵyn boldyrmaý jáne ony basqarýǵa qatysty negizgi máselelerdi sheshý kerek.

- Birinshiden, «kóleńkeli» ekonomıkamen kúreske mán bergen jón. Resmı statıstıkaǵa súıensek, Qazaqstanda «kóleńkeli» ekonomıkanyń deńgeıi 18 paıyz shamasynda, ıaǵnı ekonomıkanyń besten biri. Onymen kúresý úshin Qazaqstan tolyqtaı qolma-qol aqshadan bas tartýy kerek dep sanaımyn. Qazirdiń ózinde bizde elektrondy tártipte esep aıyrysý jappaı taraǵan... Eger biz qolma-qol aqshamen esep aıyrysýdan tolyqtaı bas tartsaq, jemqorlyqpen jáne «kóleńkeli» ekonomıkaǵa tosqaýyl qoıýda nátıjeli bolady, - dedi sarapshy.

Eske salsaq, bıyl naýryz aıynda Premer-mınıstrdiń orynbasary — Ulttyq ekonomıka mınıstri Serik Jumanǵarın páter satyp alý kezinde qolma-qol aqshasyz esep aıyrysý usynysyna pikir aıtty.