Kollektormen jumys jasaǵanda qaryz alýshy neni bilýi kerek - QR Ulttyq banki
ALMATY. QazAqparat - QR Ulttyq bank mamandary kollektorlyq agenttik ótinish jasaǵan jaǵdaıda qaryz alýshy neni bilýi qajettigin aıtyp berdi, dep habarlaıdy QazAqparat.
QR UB baspasóz qyzmetiniń málimetinshe, 2017 jyldan bastap kollektorlyq agenttikterdiń qyzmeti «Kollektorlyq qyzmet týraly» zańmen retteledi. Zańǵa sáıkes QR Ulttyq banki kollektorlyq agenttikterdiń qyzmetin memlekettik retteý men baqylaýdy júzege asyrady.
Zańnyń erejelerine sáıkes kollektorlyq agenttik - ekinshi deńgeıdegi bankterdiń (bankter) nemese mıkroqarjy uıymdarynyń (MQU) qaryzdary boıynsha bereshekti óndiretin uıym.
Kollektorlyq agenttiktiń óz qyzmetin Ulttyq bankte eseptik tirkeýden ótkennen keıin jáne ony Kollektorlyq agenttikterdiń tizilimine engizgennen keıin ǵana júzege asyrýǵa quqyly ekendigin bilý qajet.
Tizimdi Ulttyq banktiń saıtynan kórýge bolady.
Óndirip alý bereshekti óndirip alý shartynyń negizinde júzege asyrylady jáne banktik qaryz shartynda nemese mıkrokredıt berý týraly shartta banktiń jáne MQU-nyń úshinshi tulǵalardy tartýǵa quqyǵy bolǵan kezde ǵana yqtımal. Bul rette MQU-ǵa jeke tulǵamen jasalǵan jáne turǵyn úı túrinde kepilmen qamtamasyz etilgen shart boıynsha bereshekti óndirip alý úshin kollektorlyq agenttikti tartýǵa tyıym salynady.
«Bankter men MQU qaryz alýshynyń kelisimi bolǵan kezde qaryz, mıkrokredıt boıynsha talap etý quqyǵyn berýge nemese ózgeshe aıtqanda qaryzdy, mıkrokredıtti kollektorlyq agenttikke «satýǵa» quqyly. Mundaı jaǵdaılarda kollektorlyq agenttik jańa kredıtor bolady jáne berilgen sharttyń talaptaryn, sondaı-aq bankter men MQU-ǵa qoıylatyn barlyq zańnamalyq talaptar men shekteýlerdi saqtaýǵa mindetti. Bankter talap etý quqyǵyn banktik qaryz sharty boıynsha 90 kúnnen astam, al jeke tulǵanyń ıpotekalyq qaryzy boıynsha 180 kúnnen astam tólemniń merzimin ótkizý bolǵan kezde berýge quqyly», delingen habarlamada.
Bul rette MQU talap etý quqyǵyn qaryz 90 kúnnen astam tólebegen kezde ǵana berýge quqyly. Kepilge turǵyn úı qoıylǵan jeke tulǵanyń mıkrokredıti boıynsha talap etý quqyǵyn kollektorǵa berilmeıdi.
Kollektorlyq qyzmetti júzege asyrý kezeńinde bankter men MQU boryshkerge qatysty bereshek kollektorlyq agenttikte jumysta bolǵan kezeńde syıaqyny, komıssııalardy jáne ózge tólemderdi tóleýdi talap etýge, sondaı-aq atalǵan kezeńde turaqsyzdyq aıybyn esepteýge quqyǵy joq.
Kollektorlyq agenttiktiń qyzmetkeri boryshkermen alǵash baılanys jasaǵan kezde tanysýǵa, kredıtordyń ataýyn jáne kollektorlyq agenttiktiń baılanys derekterin, Kollektorlyq agenttikterdiń tizilimindegi eseptik tirkeý nómirin, bereshek týraly aqparatty habarlaýǵa mindetti.
Kollektorlyq qyzmetti júzege asyrý tártibi týraly tolyq aqparat Kollektorlyq qyzmet týraly zańnyń 5-babynda belgilengen. Sondaı-aq zańda kollektordyń boryshkerge habarlasatyn ýaqyty belgilengen.
«Kollektorlyq agenttiktiń boryshkermen ózara is-áreket etýi kollektorlyq agenttiktiń bastamasy boıynsha jeke baılanys jasaǵan kezde jumys kúnderi saǵat 8.00-den 21.00-ge deıingi kezeńde 1 retten kóp emes jáne telefonmen kelissózder júrgizý arqyly jumys kúnderi saǵat 8.00-den 21.00-ge deıingi kezeńde 3 retten kóp emes, jumys kúnderi saǵat 8.00-den 21.00-ge deıingi kezeńde sheshiledi», delingen habarlamada.
Kollektorlyq agenttik boryshkerge qaýip tóndirý, til tıgizý, bopsalaý, aldap-arbaý, sondaı-aq kommertsııalyq nemese QR zańymen qorǵalatyn ózge de qupııany jarııalaý sııaqty adal emes is-áreketterdi qoldanýǵa qatań tyıym salynady.
Aıta keterligi, 2018 jyly kollektorlyq agenttikterge qatysty ákimshilik aıyppul túrinde 5 sanktsııa jáne 14 shekteý sharasy qoldanylǵan. Eger kollektorlyq agenttikter boryshkerdiń quqyǵyn buzsa onda ol Ulttyq bankke nemese onyń aýmaqtyq fılıaldaryna ótinish bildire alady. Qoǵamdyq qabyldaý bólmeleriniń baılanys aqparaty Ulttyq banktiń saıtynda ornalastyrylǵan.
