Kollektorlyq qyzmet týraly zańnamany buzǵany úshin úsh jylǵa deıin bas bostandyǵynan aıyrý jazasy usynylady - UB
ASTANA. QazAqparat - Kollektorlyq qyzmet týraly zańnamany buzǵany úshin úsh jylǵa deıin bas bostandyǵynan aıyrý jazasy usynylady.
Bul týraly búgin Májiliste «Kollektorlyq qyzmet týraly» zań jobasynyń tanystyrylymy barysynda málim boldy.
QR Ulttyq banki tóraǵasynyń orynbasary Alpysbaı Ahmetovtiń aıtýynsha, zań jobasy boıynsha kollektorlyq agenttik qyzmetkerlerine, sonyń ishinde basshy qyzmetkerlerge qoıylatyn talaptar belgilenip otyr. Budan bólek, qujatta kollektorlyq agenttikterdiń boryshkerlerden bereshekti óndirip alý barysynda tyıym salynatyn zańsyz áreketterin aıqyndaıtyn normalar da qamtylǵan. Atap aıtqanda, kollektorlyq agenttik qyzmetkerlerine boryshkerlerdiń quqyqtary men erkindikterine qol suǵatyn jáne onyń ómirine, densaýlyǵyna jáne múlkine qaýip tóndiretin zańsyz is-qımyldar jasaýǵa tyıym salynady.
«Kollektorlyq qyzmetti tirkeýsiz júzege asyrǵany úshin, banktik qupııany, mıkrokredıt berý qupııasyn quraıtyn málimetterdi, qujattardy urlap, paraǵa satyp alý, qorqytý arqyly alǵany jáne jarııalaǵany úshin 3 myń aılyq eseptik kórsetkish kóleminde aıyppul salynady nemese 3 jylǵa deıin bas bostandyǵynan aıyrylady», - dedi A. Ahmetov.
Onyń sózine qaraǵanda, boryshkerlerdiń quqyqtaryn jáne zańnamanyń talaptaryn buzǵany úshin 250 aılyq eseptik kórsetkishke deıin aıyppul salynady. Sonymen qatar, kollektorlyq qyzmet týraly talap etiletin aqparatty Ultyq bankke usynbaǵandar, shekteýli yqpal etý sharalaryn oryndamaǵandar úshin de 200 AEK shamasynda aıyppul salý usynylǵan.
