Kollektorlyq agenttikter Ulttyq bankte mindetti túrde tirkeletin bolady
ASTANA. QazAqparat - Búgin Parlament Májilisinde «Kollektorlyq qyzmet týraly» jáne «Qazaqstan Respýblıkasynyń keıbir zańnamalyq aktilerine kollektorlyq qyzmet máseleleri boıynsha ózgerister men tolyqtyrýlar engizý týraly» zań jobalarynyń tanystyrylymy bolyp ótti.
Zań jobasy áleýmettik táýekelderge ushyraıtyn banktik kredıtteý jáne mıkroqarjylandyrý sektorynda týyndaıtyn merzimi ótken bereshekti óndirip alý barysyndaǵy kollektorlyq agenttik, kredıtor jáne boryshkerdiń arasyndaǵy ózara qatynastardy retteýge baǵyttalǵan.
QR Ulttyq banki tóraǵasynyń orynbasary Alpysbaı Ahmetovtiń aıtýynsha, zań jobasy arqyly kollektorlyq qyzmetter naryǵyn damytýǵa qolaıly quqyqtyq jaǵdaılar jasalyp, merzimi ótken bereshekti óndirýdiń tıimdiligi qamtamasyz etiledi. Sonymen qatar, halyqtyń kollektorlyq qyzmetke senimdiligin arttyryp, áleýmettik shıelenisterdi tómendetý da qarastyrylyp otyr.
«Zań jobasynda kollektorlyq agenttikterdi QR Ulttyq banki reestrinde mindetti túrde tirkeý týraly norma kózdelip otyr. Bul olardyń qyzmetin aıqyn ári jarııa etedi. Sonymen qatar, Ulttyq banktiń ókilettiligi bekitiledi. Ulttyq bankke baqylaý fýnktsııalary, kollektorlyq qyzmetti shekteýge áser etý sharalary men talaptardy oryndamaǵan kollektorlyq agenttikterge qatysty sanktsııa qoldaný quzyreti beriledi», - dedi A. Ahmetov.
UB ókiliniń sózine qaraǵanda, zań jobasynyń basym mindetterine kollektorlyq agenttikterdiń asyra silteýshilikterinen boryshkerlerdiń quqyqtary men múddelerin qorǵaýdy qamtamasyz etý normalary kirip otyr. Budan bólek, kóleńkeli kollektorlyq agenttikterdi boldyrmaý, kollektorlyq qyzmettiń aıqyndylyǵyn jáne olardyń boryshkerlermen ózara qatynastarynyń qaýipsizdigin arttyrý máseleleri de qarastyrylady.
