Kollektorlyq agenttikterde 11,8 mlrd teńge tabysty jasyrý deregi anyqtaldy

ASTANA. KAZINFORM – Memlekettik kirister komıteti kollektorlyq qyzmet salasynda júrgizilgen tekserýler nátıjesinde iri kólemdegi salyqtyq buzýshylyqtardy anyqtady.

Vedomstvo málimetinshe, 7 kollektorlyq agenttik boıynsha 11,8 mlrd teńge kóleminde tabystyń tómendetilip kórsetilgeni belgili boldy. Sonymen qatar 128 mln teńge qosylǵan qun salyǵy tólenbegen, al QQS boıynsha tirkeýge turmaǵany úshin 1,6 mlrd teńge aıyppul eseptelgen.

– Júrgizilgen tekserýler barysynda jekelegen kollektorlyq agenttikter tabysty QQS salynatyn aınalym retinde kórsetpeıtin shemalardy qoldanǵany anyqtaldy. Mundaı tásil júıeli sıpatqa ıe bolyp, naryqtaǵy birqatar sýbektiler tarapynan qoldanylǵan, – delingen Memlekettik kirister komıtetiniń habarlamasynda.

Sonymen qatar uqsas belgileri bar taǵy 15 salyq tóleýshi anyqtalǵan. Olarda tabysty tómendetýdiń yqtımal kólemi 61,6 mlrd teńgeni, al tólenbegen QQS shamamen 7,4 mlrd teńgeni quraýy múmkin. Qazirgi ýaqytta bul derekter tekserilý ústinde.

Tekserý nátıjesinde kollektorlyq agenttikterdiń bereshekti nomınal qunynan tómen baǵamen satyp alyp, keıin ony óndirip alý barysynda túsken qarajatty qaryzdy qaıtarý retinde kórsetip, salyqtan jaltarǵany belgili boldy.

– Satyp alynǵan bereshektiń quny men naqty óndirip alynǵan soma arasyndaǵy aıyrma – bul óndirip alý qyzmetinen alynǵan tabys. Mundaı tabys salyq salynatyn aınalymǵa engizilýi tıis, – dep atap ótti komıtet.

Vedomstvo bul tájirıbeniń jekelegen emes, júıeli sıpat alǵanyn jáne naryqtaǵy kóptegen qatysýshylar tarapynan qoldanylyp otyrǵanyn málimdedi.

– Eger operatsııalar nátıjesinde tabys qalyptassa, ol qandaı túrde kórsetilgenine qaramastan salyq salýǵa jatady. Osyǵan baılanysty barlyq salyq tóleýshiler úshin teń jaǵdaı jasaý maqsatynda qosymsha taldaý jáne tekserý jumystary jalǵasady, – delingen habarlamada.

Qazirgi ýaqytta anyqtalǵan salyq tóleýshilerge qatysty tolyq tekserýler júrgizilip, tıisti sharalar qabyldanýda.

Aıta keteıik, qarjy sektorynda salyq erejeleri jańartylyp, birqatar jeńildik qarastyryldy.