Kollektorlardyń jumysyn retteý úshin zańnamaǵa ózgeris engiziledi

ASTANA. QazAqparat – Kollektorlyq qyzmetti retteýdi qatańdatýǵa baǵyttalǵan zańnamalyq túzetýler blogy ázirlendi. Bul týraly QR Qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanovtyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«2021 jyly agenttik 25 kollektorlyq agenttikke jospardan tys tekserý júrgizdi. Olardyń úlesine kredıt boıynsha berilgen bereshektiń jalpy kóleminiń 75 paıyzdan astamy tıesili. Tekserý qorytyndysy boıynsha agenttik kollektorlyq agenttikterge qatysty 20 jazbasha nusqama, 2 jazbasha eskertý qoldandy», - dedi ol.

Onyń atap ótýinshe, nátıjesinde jalpy somasy 42,2 mln teńgege 91 ákimshilik jaza belgilendi. Kollektorlyq agenttikterdiń 15 qyzmetkeri jumystan shyǵaryldy.

«2022 jyldyń toǵyz aıynda 31 kollektorlyq agenttik agenttiktiń baqylaý jáne qadaǵalaý fýnktsııalaryn júzege asyrý nátıjeleri boıynsha tizilimnen shyǵaryldy. Agenttik júrgizilgen tekserýlerdiń, anyqtalǵan buzýshylyqtar men azamattardyń shaǵymdarynyń qorytyndylary boıynsha kollektorlyq qyzmetti retteýdi qatańdatýǵa baǵyttalǵan zańnamalyq túzetýler blogyn ázirledi», - dedi Nurlan Ábdirahmanov.

Ashyq kózderden alynǵan foto