Kollektorlardyń zańsyz áreketine jol bermeýge qatysty talaptar kúsheıtiledi
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy «Qazaqstan Respýblıkasy azamattarynyń borysh júktemesin azaıtý sharalary týraly» Qazaqstan Respýblıkasy Prezıdentiniń 2019 jylǵy 26 maýsymdaǵy № 34 Jarlyǵyna jáne Memleket basshysynyń 2020 jylǵy 24 qańtarda ótken Úkimettiń keńeıtilgen otyrysynda berilgen tapsyrmasyna sáıkes ázirlendi.
Zań jobasynyń maqsaty – bul qarjylyq qyzmetterdi tutynýshylardyń quqyqtaryn qorǵaýdy kúsheıtý.
Depýtattardyń túzetýleri:
- kredıt berý táýekelderiniń ósýine jáne azamattardyń boryshtyq júktemesiniń shamadan tys ósýine jol bermeý;
- daýlardy retteý, boryshkerlerdiń quqyqtaryn kúsheıtý tetigin jetildirý;
- kollektorlardyń josyqsyz áreketteriniń jolyn kesýge, sondaı-aq boryshkerlerdiń quqyqtaryn qorǵaýdy kúsheıtýge baǵyttalǵan.
Kredıt berýde táýekelderdiń ósýine jáne azamattardyń kredıtter (kásipkerlik qyzmetti júzege asyrýmen baılanysty emes) boıynsha boryshtyq júktemesiniń shamadan tys ósýine jol bermeý úshin túzetýlerde:
- bankter men mıkroqarjy uıymdaryna (MQU) kapıtaldandyrylǵan merzimi ótken syıaqyǵa (turaqsyzdyq aıybyna, aıyppuldarǵa, ósimpuldarǵa, komıssııalarǵa) syıaqyny esepke jazýǵa tyıym salý;
- mıkrokredıtter boıynsha turaqsyzdyq aıybynyń (aıyppuldyń, ósimpuldyń) mólsherin shekteý, sondaı-aq ıpotekalyq qaryzdardyń barlyq túrleri boıynsha merzimi ótken 180 kúnnen keıin syıaqylar men komıssııalardy esepke jazýǵa tyıym salý;
- qarjy uıymdarynyń jarnamasyna monıtorıngti júzege asyrý kózdelip otyr.
Mıkrokredıt berý salasyndaǵy táýekelderdi shekteý, alaıaqtyq áreketterge jol bermeý jáne syıaqynyń shekti mólsherlemeden asyp ketýin shekteý úshin:
- bankter men MQU-nyń kredıttik bıýroǵa nomınaldy mólsherlemeler jáne jyldyq tıimdi syıaqy mólsherlemesi (JTSM) týraly aqparat berý, sondaı-aq memlekettik kredıttik bıýronyń qadaǵalaý maqsattary úshin osy málimetterdi retteýshige berý mindeti;
- MQU-nyń jarnamany taratý jáne ornalastyrý kezinde JTSM-di kórsetý;
- MQU-nyń Agenttik pen qarjy monıtorıngi jónindegi organdy mıkroqarjy uıymy retinde memlekettik tirkelýi týraly habardar etý mindeti engizilip otyr.
Zań jobasy kollektorlyq agenttikterdiń qalyptastyrylǵan jarǵylyq kapıtalynyń eń tómen mólsherine qoıylatyn talaptardy belgileıdi. Kollektorlyq agenttiktiń jarǵylyq kapıtalynyń eń tómen mólsheri ýákiletti organnyń normatıvtik quqyqtyq aktisinde belgilenetin bolady.
Kollektorlyq uıymdardyń josyqsyz áreketterine jol bermeý úshin:
- kollektorlarǵa bóten telefon nómirlerinen ózara is-qımyl jasaýǵa tyıym salý;
- boryshkerlermen ózara is-qımyl jasaý protsesin beıne-aýdıo tirkeý mindetin belgileý;
- kollektordyń úshinshi tulǵalarmen ózara is-qımylyn jasaýyn shekteý usynylyp otyr.
Aıta keteıik, 2020 jyly jeltoqsanda Parlament Májilisi «Qazaqstan Respýblıkasynyń keıbir zańnamalyq aktilerine Qazaqstanda mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldaǵan edi.
