Kollektordaǵy qaıǵyly oqıǵa: Kúdikti qazaqstandyq Máskeý tergeý ızolıatorynda eki aı otyrady

MÁSKEÝ. QazAqparat – Qazaqstan azamaty, ekskýrsııalyq onlaın dúkenniń bas dırektory Aleksandr Kım Máskeý qalasyndaǵy Zamoskvoretskıı sotynyń sheshimimen qamaýǵa alyndy, dep habarlaıdy QazAqparat tilshisi.

Jalpy ıýrısdıktsııa sottary resmı portalynyń málimetinshe, 23 tamyzda Máskeý qalasynyń Zamoskvoretskıı soty tergeý organdarynyń Aleksandr Kımdi qamaýǵa alý týraly ótinishin qaraý úshin otyrys ótkizdi.

Sot talqysynyń qorytyndysy boıynsha, Zamoskvoretskıı sotynyń sýdıasy Irına Zorına ótinishti qanaǵattandyrý jóninde sheshim qabyldady.

RF QK 238-babynyń 3-bóliginde kózdelgen qylmys jasady dep aıyptalǵan Qazaqstan azamatyna (taýarlar men ónimderdi óndirý, saqtaý, tasymaldaý nemese satý, qyzmet kórsetý, abaısyzda eki nemese odan da kóp adamnyń ólimine ákep soqtyrǵan qaýipsizdik talaptaryna sáıkes kelmeıtin jumystardy oryndaý) osy áreketti jasaǵany úshin bes jylǵa deıingi merzimge májbúrleý jumystary nemese on jylǵa deıingi merzimge bas bostandyǵynan aıyrý túrindegi jaza kózdelgen.

Sonymen qatar, sársenbi kúni Máskeýdiń sý aǵatyn kollektoryndaǵy adam ólimi boıynsha ekinshi aıyptalýshy - jerasty ekskýrsııalaryn uıymdastyrýshy Nıkıta Dýbas qamaýǵa alyndy.

Aıyptalýshylar 21 qazanǵa deıin qamaýda bolady.

Buǵan deıin habarlaǵanymyzdaı, qatysýshylary habarsyz ketken zańsyz ekskýrsııa 20 tamyz kúni Máskeýde ótken.

Nóser jaýyn jaýǵan kezde sý kúrt kóterilip, dıggerlerdiń qashyp qutylatyn múmkindigi bolmaǵan.

Segiz adam qaıtys bolyp, olardyń denesi Neglınka ózeninen tabyldy.

QR azamaty A. Kımge qatysty qylmystyq is Qazaqstannyń Reseıdegi Elshiliginiń baqylaýynda.