Kolledjge túsýshiler 4 mamandyq tańdaı alady

NUR-SULTAN. QazAqparat – Kolledjge túsýshi talapkerler 4 mamandyq tańdaı alady. Bul týraly QR BǴM Tehnıkalyq jáne kásiptik bilim departamenti dırektorynyń orynbasary Ernat Júnisov aıtty, dep habarlaıdy QazAqparat tilshisi.

Onyń atap ótýinshe, kolledjge túsýshiler úshin qabyldaý emtıhandary alynyp tastaldy. Tek pedagogıka, medıtsına jáne óner mamandyqtaryna ǵana qabyldaý emtıhandary ótkiziledi. Óıtkeni, medıtsına mamandyǵy boıynsha talapkerler psıhometrııalyq test tapsyrady. Al pedagogıkalyq mamandyq boıynsha áńgimelesý túrindegi test bolady.

«Buryn talapkerlerimiz bir ǵana mamandyqqa tapsyratyn bolsa, endi 4 mamandyq tańdaýǵa múmkindik alyp otyr. Bul talapkerlerimiz úshin jasalǵan úlken múmkindik dep oılaımyn. Emtıhan alynyp tastalǵandyqtan árbir mamandyq boıynsha beıindi jáne mindetti pánderdi anyqtadyq. Mysaly konkýrs aqparattyq júıe mamandyǵyna qatysty bolsa, onda talapker úshin eki pán mindetti bolady. Biri – algebra, ekinshisi – ınformatıka. Osy eki pánniń baǵasy men qazaq tobyna tasyratyn bolsa qazaq tiliniń baly eseptelinedi. Osy úsh pánniń ortaq baly shyǵarylady jáne ol konkýrs baly sanalady», - dedi Ernat Júnisov.

Dırektor orynbasarynyń aıtýynsha, osy ýaqytqa deıin kolledjge túsýshiler úshin 6 kvota qarastyrǵan. Endi oǵan taǵy 3 kvota qosylyp otyr. Atap aıtqanda, kópbalaly otbasydan shyqqan balalarǵa 5 paıyz, tolyq emes otbasydan shyqqan balalarǵa 1 paıyz jáne múgedek bala tárbıelep otyrǵan otbasylar úshin 1 paıyz kvota beriledi.

«Qazirgi ýaqytta deıin 129 myńǵa tarta talapker qujattaryn tapsyrdy. 29 shilde men 3 tamyz aralyǵynda óner mamandyqtary boıynsha konkýrs ótip, nátıjesi shyǵaryldy. 3 700-den astam talapker qujat tapsyryp, 2 800 oqýǵa tústi. Óıtkeni, memlekettik tapsyrys 2 800 adamǵa bólingen. Kelesi konkýrs medıtsına men pedagogıka mamandyqtary boıynsha tamyzdyń 18-21 aralyǵynda ótkiziledi. Nátıjesin 22-23 tamyz kúnderi shyǵaramyz. Kolledjge túkenderge kóptegen áleýmettik jeńildik bar. Jumysshy mamandyǵyna túsken talapkerler bir mezgil ystyq tamaqpen qamtamasyz etiledi jáne 21 787 teńge shákirtaqy alady. Al jataqhanada oryn eń aldymen az qamtylǵan otbasydan shyqqan jáne 1-kýrsqa túsken balalarǵa birinshi kezekte beriledi. Búginde 438 jataqhanada 60 myńnan astam oryn bar», - dedi Ernat Júnisov.