«Kolledjge qatysty kózqaras ózgeredi» - baspasózge sholý
***
«Egemen Qazaqstan» gazetiniń búgingi sanynda «Saıasattanýshylar Strategııa týraly» atty maqala jarııalandy. Keshe Nazarbaev Ýnıversıtetinde Mádenıet jáne sport mınıstrligi men «Qazaqstan saıasattanýshylar kongresi» respýblıkalyq qoǵamdyq birlestiginiń uıymdastyrýymen «Qazaqstan joly - 2050» Strategııasy» degen taqyrypta respýblıkalyq forým ótti. Oǵan Parlament depýtattary, ǵalymdar men oqytýshylar, saıasattanýshylar men sarapshylar qatysty. Parlament Májilisiniń depýtaty, saıası ǵylymdar doktory Kamal Burhanov moderatorlyq etken forýmda sóz alǵandar «Qazaqstan-2050» Strategııasynyń maqsattary men mindetterine qol jetkizýde qazaqstandyq saıasattaný jáne áleýmettaný ǵylymdarynyń rólin arttyrý úshin negiz qalaıtyn joǵary ǵylymı standarttar jasaý qajettigin atap ótti. Sonymen qatar, olar Qazaqstannyń álemdegi eń damyǵan 30 eldiń qataryna qosylý jónindegi mindetterdi baǵyndyrý úderisine ǵylymı jáne sarapshylar qoǵamdastyqtarynyń ókilderin keńinen tartý memleket pen qoǵamnyń odan ári damýy úshin berik irgetas qalaýǵa qabiletti bolatynyna senim bildirdi.
***
«Aıqyn» gazetiniń búgingi sanynda «Kolledjge qatysty kózqaras ózgeredi» degen maqala berilgen. Aldaǵy ýaqytta elimizde salynyp jatqan álemdik deńgeıdegi kolledjder janynan arnaıy mektepter qurylatyn bolady. Bul týraly Prezıdent janyndaǵy Ortalyq kommýnıkatsııalar qyzmetinde ótken brıfıngte «Kásipqor» holdıngi» UAQ basqarmasynyń tóraıymy Eldana Sádýaqasova málim etti. Onyń aıtýynsha, 4 óńiraralyq ortalyq negizinen monosalalardy qamtýymen erekshelenedi. Mysaly, Atyraýdaǵy ortalyqta munaı jáne gaz salasyna basymdyq berilse, Óskemende mashına qurylysyna, Ekibastuzda - energetıka, al Shymkenttegi óńirlik ortalyǵynda - azyq-túlik pen jeńil ónerkásipke basymdyq beriledi.
- Biz sheteldik oqý mekemelerimen birlese otyryp, oqý baǵdarlamalaryna múldem jańa qadam jasaımyz. Tańdap alynǵan on áriptes kolledj arqyly jańadan salynatyn alty kolledjge, sosyn barlyq tájirıbeni tehnıkalyq jáne kásibı bilim salasyndaǵy 278 tehnıkalyq kolledjderge engizetin bolamyz. Bul birneshe saty boıynsha júzege asady. Eń birinshi, oqytýshylardyń kásibı quramyn jańartýdan bastaımyz, - deıdi holdıng basshysy Eldana Sádýaqasova.
Osy basylymda «Qosmekendilerdiń kóksegeni ne?» degen maqala jarııalandy. Qazaqstan zańy boıynsha bizdiń eldiń azamattaryna bir mezgilde eki eldiń azamaty bolýǵa tyıym salynǵan. ıAǵnı qos azamattyq alýǵa quqyq joq. Alaıda quqyq qorǵaý organdarynyń anyqtaýynsha, mindetti túrde Qazaqstan azamaty bolýy tıis ókiletti organdarda isteıtin memlekettik qyzmetkerlerdiń ishindegi keıbireýleri Reseı azamattyǵyn qosymsha alyp alǵan kórinedi. Ondaılardy «bıpatrıd» dep ataıdy. Qazaqstan men Reseıdiń shekaralas prokýratýra basshylarynyń eki jaqty kezdesýinde Qazaqstan Bas prokýratýrasyndaǵy Jalpy qadaǵalaý departamenti bastyǵynyń orynbasary Nurdáýlet Súıindikov «...qos azamattyq alý faktileri anyqtalyp jatyr, nátıjesinde, burynǵy Qazaqstan azamattary qazaqstandyq kásiporyndarda jumystaryn, zeınetaqy men járdemaqylaryn alýdy jalǵastyrýda. Bizdiń oıymyzsha, Reseıde de týra osyndaı jaǵdaılar bolýy múmkin. Qazaqstandyq azamattyqtan bas tartý rásiminsiz Reseı azamattyǵyn alǵan adamdardy, tipti memlekettik qyzmette, sonyń ishinde ókiletti organdardyń depýtattary bolyp júrgenderdi quqyq qorǵaý organdary anyqtap jatyr. Bul másele qos azamattyqqa tyıym salatyn bizdiń Konstıtýtsııamyzǵa qaıshy», - dep málimdedi. Bul jaǵdaıdy retteý úshin eki jaqtyń quzyrly organdary aqparattar almasý úshin málimetter bazasyn qurýǵa birneshe márte talpynǵan eken, biraq ondaı kelisim jasalmaǵandyqtan, jeke tulǵalarǵa qatysty málimetterdi qorǵaý protsedýrasyna silteme jasalyp, aqparattar almasý máselesi jyljymapty.
***
«Ana tili» gazetiniń sońǵy sanynda belgili sánger Aıda Kaýmenovamen aradaǵy suhbat basyldy. «Eger meniń kıimderimdi birden tanyp jatsańyzdar, bul men úshin úlken jetistik. Men óz kıim úlgilerim arqyly qazaq qyzynyń beınesin, qazaqtyń tarıhynan syr shertetin dástúrin somdaǵym keldi. Sondyqtan men ózindik qoltańbamdy qalyptastyra aldym dep tolyq aıta alamyn. Italııadan oqyp kelgenimde, kópshilik menen shetelde jumys istegiń kele me dep suraı bastady. Alaıda men shetelge ózimdi tanytýdy emes, qazaq qyzyna laıyq kıim shyǵarýdy basty maqsat etip qoıdym. «Ózge elde sultan bolǵansha, óz elińde ultan bol» demekshi, elimdi tastap shetelde tanymal bolýdy murat qylmadym. «Otan - ottan da ystyq» degen osy shyǵar. Men kerisinshe ózimizdiń ulttyq qundylyqtarymyzdy shetel sahnasyna dáriptegim keldi. Men úshin elimniń damýyna, kórkeıýine óz eńbegimdi sińirýden artyq eshnárse joq edi», - deıdi sánger. Osy suhbat «Aıda Kaýmenova: Kıimimizdiń ózinen ulttyq erekshelik baıqalýy tıis» degen taqyryppen kópshilik nazaryna usynylyr otyr.
***
«Ekspress-K» basylymynda «Lýchshe strelıaı glazamı» degen materıal berilgen. Ótken demalystardy Almaty oblysynyń 26 jasar turǵyny uzaqqa deıin umytpaıtyn bolady. Almatyǵa dosynyń úılený toıyna kelgen jigit "Land Krýzer" kóliginiń ishinde otyryp tapanshadan oq atyp, kózge túsken. Osyny kórgen kýágerler bul áreketti dereý beınekameraǵa túsirip alǵan eken. Keıin qozǵalystaǵy kóliktiń birinen oq atqan azamattyń aty-jónin polıtsııa qyzmetkerleri anyqtady. Bul jigit sol kúni óziniń atyna tirkelgen gazdy tapanshadan bos patrondarmen atqandyǵyn alǵa tartýda. Osy fakti boıynsha ol ákimshilik jaza retinde 10 táýlikke qamaýǵa alyndy.
