Kolledjdiń bas býhgalteri men ekonomısi bıýdjettiń 10 mln qarjysyn jymqyrǵan
QR Qarjy mınıstrliginiń Feısbýktegi resmı paraqshasynda jarııa etilgen málimetke sáıkes, kolledjdiń bas býhgalteri men ekonomısi jeke shottaryna eńbekaqy retinde 10 mln 331 myń teńge aqshany negizsiz aýdarǵan. Osylaısha «Azamattyq qyzmetshilerge, memlekettik bıýdjet qarajaty esebinen ustalatyn uıymdardyń qyzmetkerlerine, qazynalyq kásiporyndardyń qyzmetkerlerine eńbekaqy tóleý júıesi týraly» Qazaqstan Respýblıkasy Úkimetiniń qaýlysyn buzǵan.
«Sondaı-aq 2017 jyldyń ishinde bas býhgalter eńbekaqy, syıaqy jáne eńbek demalysy úshin kózdelgen 1 mln 636 myń teńgeniń ornyna Halyq banktegi jeke shotyna 8 mln 052 myń teńge, al ekonomıstke kózdelgen 1 mln 168 myń teńgeniń ornyna 3 mln 915 myń teńge aýdarǵan. Qazirgi ýaqytta kolledj qyzmetkerlerine jalaqy, demalys jáne ózge de tólemaqylardyń zańdy aýdarylýyna aýdıt júrgizilýde», - dep atap ótedi mınıstrlik.