Kolledjderge 10 myńnan astam stýdent jumysqa ornalastyrý shartymen qabyldanady
ASTANA. KAZINFORM — Bıyl elimizde kásiporyndardyń suranysy boıynsha kolledjderge 10 myńnan astam stýdent qabyldaý josparlanyp otyr. Olardy oqý bitirgennen keıin mindetti túrde jumysqa ornalastyrý kózdelgen. Bul týraly QR Oqý-aǵartý birinshi vıtse-mınıstri Shynar Aqparova málimdedi.
Ortalyq kommýnıkatsııalar qyzmetinde ótken baspasóz máslıhatynda ol tehnıkalyq jáne kásiptik bilim berý salasyndaǵy qabyldaý naýqanyna toqtaldy.
— Elimizde 763 kolledj jumys isteıdi, onda 556 myń stýdent bilim alyp jatyr. Tehnıkalyq jáne kásiptik bilimniń qoljetimdiligin qamtamasyz etý maqsatynda bıyl memlekettik bilim berý tapsyrysy aıasynda kolledjderge 133 myń stýdent qabyldaý josparlanyp otyr, — dedi Shynar Aqparova.
Onyń aıtýynsha, memlekettik bilim berý tapsyrysynyń 70%-y tehnıkalyq baǵyttar boıynsha mamandar daıarlaýǵa bólinedi.
— Kásiporyndardyń ótinimderi negizinde, keıinnen mindetti túrde jumysqa ornalastyrýdy kózdeı otyryp, 10 myńnan astam stýdentti qabyldaý josparlanyp otyr, — dedi birinshi vıtse-mınıstr.
Kolledjderge qujat qabyldaý Biryńǵaı «OQU» platformasy arqyly júzege asyrylady.
Aıta keteıik, buǵan deıin kolledjderde suranysqa ıe mamandyqtarǵa basymdyq beriletinin jazdyq.
