Kolledjderdiń jartysyna jýyǵy attestattaýdan óte almady - QR BǴM
ASTANA. QazAqparat - 2013 jyly 178 tehnıkalyq jáne kásiptik bilim berý uıymdary arasynda júrgizilgen attestattaý jumystary kezinde kolledjderdiń 73-i (41 paıyzy) qulaǵan.
Bul týraly "QazAqparat" tilshisiniń resmı saýalyna bergen jaýabynda QR Bilim jáne ǵylym mınıstrligi habarlady.
Mınıstrliktiń málim etkenindeı, olardyń oqytý standarttary talapqa saı kelmegen, stýdentter de synaqtan óte almaǵan. Olarǵa qatysty 78 ákimshilik is qozǵaldy, nátıjesinde 4033 AEK kóleminde aıyppul salynyp, lıtsenzııalary ýaqytsha toqtatyldy. Sonymen qatar 273 kolledjge tekserister júrgizildi. Olardyń 134-inde (49 paıyzynda) zań buzýshylyqtar anyqtaldy.
Qazirgi ýaqytta elimizde 849 kolledj qyzmet jasaıdy. Sonyń ishinde 472 (55,6%) memlekettik jáne 377 (44,4%) - jekemenshik.
"QR Bilim jáne ǵylym mınıstrligi jumys berýshiler arasynda saýalnama júrgizgen joq, sol sebepti tehnıkalyq jáne kásiptik bilim berý mekemeleriniń otandyq mamandardy daıarlaý sapasyna qatysty qandaı da bir baǵa jasalmaǵan. Degenmen bolashaqta Qazaqstan kásipkerleri ulttyq palatasymen birlesip, osyndaı zertteýlerdi júrgizý jóninde talqylaýlar júrýde", - dep jazady vedomstvo.
Bilim mınıstrligi jibergen aqparatqa sáıkes, jumys berýshiler kolledjderdegi jas mamandardy daıarlaýǵa qatysyp keledi. Dýaldi oqytý júıesin, sonymen qatar oqytý baǵdarlamasyn engizýge de óz úlesterin qosýda.
