Kolledjderdiń úzdik 100 stýdenti anyqtalady
QR Bilim jáne ǵylym mınıstrliginiń málimetinshe, respýblıkalyq baıqaýǵa 338 adam qatysyp jatyr. Joba jeńimpazdary óz mamandyǵy boıynsha kásiporyn basshylarynan jumysqa ornalasýǵa shaqyrý alady
«Qazaqstan Respýblıkasy kolledjderiniń TOP-100 stýdenti» baıqaýynyń respýblıkalyq kezeńi bastaldy. Joba talantty jastardy qoldaýǵa jáne jumysshy mamandyqtaryn dáripteýge baǵyttalǵan.
Respýblıkalyq kezeńge irikteý arqyly úlgerimi jaqsy jastar, stýdenttik ózin-ózi basqarý jáne eriktiler qozǵalysynyń kóshbasshylary, «World Skills» halyqaralyq chempıonattarynyń, olımpıadalardyń, sporttyq jarystardyń, ınnovatsııalyq ıdeıalar konkýrstary men startap-jobalardyń qatysýshylary men jeńimpazdary ótti.
«Bul - jaı ǵana áleýmettik joba emes. Baıqaý qatysýshylary arqyly biz oqýshylar men olardyń ata-analaryna kolledjde oqýdyń artyqshylyqtary týraly aqparat berip jatyrmyz. Tipti daýys berý kezinde jetistikterge jetken stýdentterdiń ómirinen qyzyqty málimetterdi bilip, kadrlardy daıarlaý baǵyttarymen tanysýǵa bolady. Jalpy baıqaý kolledj deńgeıindegi, aımaqtyq jáne respýblıkalyq, ıaǵnı osy úsh kezeńnen turady. Úzdik stýdentter 20 qazanǵa deıin jalǵasatyn onlaın-daýys berý arqyly anyqtalady. Ol úshin joba saıtyna kirip , daýys berý qajet. Internet-resýrsta qatysýshylar týraly barlyq aqparat jarııalanǵan. Joba barysy bolashaq jumys berýshilerdiń baqylaýynda, olar jeńimpazdarǵa «Job offer» jiberip, stýdentterdiń oqýy aıaqtalǵan soń jumysqa alady», – dedi QR BǴM Tehnıkalyq jáne kásiptik bilim departamentiniń dırektory Nasymjan Ospanova.
Baıqaý qatysýshylarynyń basym bóligi «Mehatronıka», «Robototehnıka jáne kiristiriletin júıeler», «Web-dızaıner», «Dánekerleýshi», «Tehnık-elektronshy», «Sýpervaızer», «Qutqarýshy», «Elektr jabdyqtaryn montajdaýshy» jáne basqa da mamandyqtar boıynsha bilim alyp jatyr.
«Jumys berýshiler bolashaq mamandardy óndiristik tájirıbege shaqyrýǵa, óndiris barysymen tanystyrýǵa daıyn. Jalpy kolledjderde 500 myńǵa jýyq stýdent bilim alyp jatyr, jyl saıyn shamamen 140 myń azamat oqýyn aıaqtaıdy. Qazaqstandyq kolledj túlekteriniń jumysqa ornalasý kórsetkishteri óte jaqsy. Máselen, túlekterdiń shamamen 70%-y dıplom alǵannan keıin birden jumysqa ornalassa, qalǵandary kóbinese joǵary oqý oryndarynda oqýyn jalǵastyryp jatyr «, – dep atap ótti Nasymjan Ospanova.
