Kolledjderdiń reıtıngi memlekettik tapsyrys qurýdyń negizine aınalady
ASTANA. QazAqparat - Kolledjderdiń reıtıngi memlekettik tapsyrys qurýdyń negizine aınalady. Bul týraly búgin Ortalyq kommýnıkatsııalar qyzmetindegi brıfıngte QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Endi kolledjderdiń mindetine toqtalsaq, bizge profılızatsııa qajet. «Atameken» UKP kelesi jyldan bastap joǵary bilimdegideı kolledjderdiń reıtıngin iske qosady. Ol naryq talaptaryn eskere otyryp, memlekettik tapsyrysty qurý, bilim berý baǵdarlamalaryn túzetý úshin negizge aınalady», - dedi mınıstr.
Onyń dereginshe, tehnıkalyq jáne kásibı bilimniń 109 qaıtalanatyn jáne qajetsiz mamandyǵy qysqarǵan. Nátıjesinde 66 beıin ózgerip, 20 kolledj biriktirilgen. 477 kolledjdiń 467-si qalǵan.
«Bul jumystardy túlekterdiń jumysqa ornalasýyn negizge ala otyryp jalǵastyratyn bolamyz. Durys bilim bermeıtin, nátıjesinde túlekteri jumysqa ornalasa almaıtyn kolledjderdiń lıtsenzııalaryn qaıta qaraý qajet», - dedi Erlan Saǵadıev.
Mınıstrdiń aıtýynsha, tehnıkalyq jáne kásibı bilim qyzmetkerleriniń mártebesin arttyrý úshin 2020 jyldan bastap orta bilim berýdegideı Ulttyq biliktilik synaǵyn engizý josparlanyp otyr.
