Kolledjderdi senimdi basqarýǵa 100 ınvestor qyzyǵýshylyq tanytty - Ashat Aımaǵambetov

NUR-SULTAN. QazAqparat - Іri ınvestorlar qazaqstandyq kolledjderdi senimdi basqarýǵa alýǵa qyzyǵýshylyq tanytyp otyr. Bul týraly búgin QR Prezıdenti janyndaǵy Sheteldik ınvestorlar keńesiniń otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Kásiptik bilimmen qamtý artyp keledi jáne qazirdiń ózinde EYDU elderiniń kórsetkishterine jaqyndap qaldyq. Kadr daıyndaýǵa jumys berýshilerdi tartý úshin seriktestik tetigi damýda, bul - dýaldy oqytý. Dýaldy oqytýmen 438 kolledj jáne 3 myńnan astam jumys berýshi qamtylǵan. Biz dýaldy oqytýdy damytqymyz keledi. Buǵan, sonymen qatar, kolledjderimizdi iri ınvestorlardyń senimdi basqarýyna berý de kiredi. Qazirdiń ózinde 5 kolledjdi senimdi basqarýǵa berdik jáne 100-den astam ınvestor qyzyǵýshylyq tanytty», - dedi mınıstr.

Onyń atap ótýinshe, «Jas maman» jobasyna bıýdjetten 58 mlrd teńge bólingen. Bul qarajatqa zamanaýı qural-jabdyqtar satyp alynady.

«Bul rette biz sapaly kadr daıyndaý úshin kásiporyndarǵa qural-jabdyqtardy ornatý maqsatynda ınvestorlarmen, bıznespen tyǵyz jumys isteıtin bolamyz. Daıyndaıtyn mamandyqtarǵa túgendeý júrgizdik. Talap etiletin jańa baǵdarlamalar ashý boıynsha jumys istep jatyrmyz jáne bıznestiń ótinimi negizinde buǵan deıin bolmaǵan 24 jańa bilim berý baǵdarlamasyn ashtyq», - dedi A.Aımaǵambetov.

Onyń atap ótýinshe, taıaý ýaqytta kolledjderdegi bilim baǵdarlamalarynyń barlyǵy jańartylady.

«Sheteldik ınvestorlardyń járdemimen kolledjderde quziret ortalyqtary ashylýda. 2023 jyldyń sońyna deıin mundaı ortalyqtar barlyq jerde jumys isteıtin bolady», - dedi ol.