Kolledjderde tek qajetti mamandyq pánderi oqytylady - BǴM
ASTANA. QazAqparat - Qazaqstan kolledjderi jumys berýshilermen ózara yqpaldastyq tetikterin jaqsartý jaǵyn oılastyrýda, dep habarlaıdy QazAqparat tilshisi QR Bilim jáne ǵylym mınıstrliginiń baspasóz qyzmetine silteme jasap.
Mınıstrlik ókilderiniń aıtýynsha, búginde kolledjderdiń kadr daıarlaý isine jumys berýshilerdi jumyldyrý jaǵy kóńil kónshitpeıdi. Sebep - kolledjdegi oqý baǵdarlamasynda jalpy bilim beretin pánder kóp. Praktıka ol pánderdiń kásibı biliktilik alýǵa tıgizer sebi tipten az ekenin kórsetip otyr.
Kolledjder men jumys berýshilerdiń arasyndaǵy ózara yqpaldastyqty kúsheıtý maqsatynda «Atameken» UKP oqý josparynyń eki modelin qoldanýdy usynyp otyr.
«Birinshi modelde 1448 saǵat kólemindegi jalpy pánder saqtalady. Ári jalpy oqý ýaqytynyń kem degende 40% óndiriste oqytý men kásibı praktıkaǵa arnalady. Ekinshi model halyqaralyq tájirıbe men jumys berýshilerdiń pikirin eskere otyryp, óndiriste oqytý men kásibı praktıkanyń saǵattaryn jalpy pánderdi bazalyq jáne kásibı modýlge kiriktirý esebinen kóbeıtýdi kózdeıdi», - delingen habarlamada.
Tájirıbege baǵyttalǵan modeldi kolledjder men stýdenttiń tańdaýy boıynsha erikti túrde engizý usynyldy. Jalpy pánderdiń saǵattary óndiristik praktıkaǵa qaraı arttyrylýy múmkin.
Sonymen qatar, stýdenttiń Konstıtýtsııalyq quqyqtary saqtalady, eger ol sheshimin ózgertip, oqýyn ýnıversıtette jalǵastyrǵysy kelse, jalpy pánderdiń saǵattaryn joǵary oqý ornynyń bazasynda júrip jetildire alady. Osylaısha, jalpy bilim berý tsıklinde tek kásibı maman retinde qalyptasýǵa qajetti pánder ǵana oqytylady.
Kamıla Ámirova
