Kolledjderde suranysqa ıe mamandyqtarǵa basymdyq beriledi
ASTANA. KAZINFORM – QR Premer-mınıstriniń orynbasary – mádenıet jáne aqparat mınıstri Aıda Balaevanyń tóraǵalyǵymen tehnıkalyq jáne kásiptik, orta bilimnen keıingi bilim berý júıesin damytý máselelerine arnalǵan keńes ótti.
Keńeste Oqý-aǵartý mınıstri Juldyz Súleımenova eńbek naryǵy men ekonomıkanyń suranysyna saı bilikti mamandar daıarlaýǵa baǵyttalǵan tehnıkalyq jáne kásiptik, orta bilimnen keıingi bilim berý júıesin odan ári damytýdyń negizgi baǵyttaryn tanystyrdy.
Mınıstrdiń aıtýynsha, sońǵy úsh oqý jyly ishinde tehnıkalyq jáne kásiptik bilim berý júıesine kórsetiletin memlekettik qoldaý aıtarlyqtaı kúsheıgen. Osy kezeńde memlekettik bilim berý tapsyrysy 48,4 myń orynǵa ulǵaıyp, kolledj stýdentteriniń sany 542,7 myńnan 556,2 myń adamǵa jetti.
Kadr daıarlaý kórsetkishterinde de oń ózgerister baıqalady. Sońǵy úsh jylda túlekter sany shamamen 20%-ǵa artqan. Onyń ishinde jumysshy biliktiligi boıynsha bitirýshiler sany 26,5%-ǵa, orta býyn mamandary 17%-ǵa kóbeıgen.
Keńeste tehnıkalyq jáne kásiptik bilim berý mazmunyn jetildirý aldaǵy kezeńniń basym baǵyty retinde belgilendi. Bul úshin kolledjderdiń bilim berý baǵdarlamalaryn jańartý, eńbek naryǵynyń suranysyna sáıkes mamandyqtar synyptaýyshyn ózektendirý jáne kadr daıarlaýdyń zamanaýı tásilderin engizý jumystary jalǵasady.
– Memleket basshysynyń tapsyrmasyna sáıkes tehnıkalyq mamandyqtardyń bedelin arttyrýǵa jáne ekonomıkanyń basym salalaryna qajetti bilikti kadrlardy daıarlaýǵa erekshe nazar aýdarý qajet, – dedi Aıda Balaeva.
Keńes barysynda ekonomıkaǵa qajetti kadrlarǵa degen suranysty boljaý máselesi de qaraldy. Vıtse-premer eńbek naryǵynda suranysqa ıe emes bilim berý baǵdarlamalaryn kezeń-kezeńimen qysqartyp, olardyń ornyna naqty qajettilikke negizdelgen jańa baǵdarlamalardy engizýdiń mańyzyn atap ótti.
Onyń aıtýynsha, jasandy ıntellekt, ınnovatsııalar, tsıfrlandyrý jáne robottandyrýdyń qarqyndy damýy jaǵdaıynda kadrlarǵa degen qajettilikti boljaý júıesi de jańa talaptarǵa saı qalyptastyrylýy tıis.
Sonymen qatar kolledjderdiń ınfraqurylymyn jańǵyrtýǵa jáne materıaldyq-tehnıkalyq bazasyn nyǵaıtýǵa basymdyq berý qajettigi aıtyldy.
Keńeste dýaldy oqytý júıesin keńeıtý jáne jumys berýshilermen ózara yntymaqtastyqty kúsheıtý de negizgi baǵyttardyń biri retinde aıqyndaldy. Sondaı-aq ekonomıkaǵa qajetti kadrlarǵa degen suranysty boljaý tetikterin jetildirý jáne bıznes qaýymdastyqpen áriptestikti damytý jumystary jalǵasady.
Keńes qorytyndysy boıynsha Aıda Balaeva bilim berý baǵdarlamalaryn eńbek naryǵynyń suranysyna saı turaqty túrde jańartyp otyrýdy, kolledjderdiń jumys berýshilermen baılanysyn kúsheıtýdi jáne dýaldy oqytý júıesin odan ári keńeıtýdi tapsyrdy.
Sondaı-aq tsıfrlandyrý, robottandyrý jáne ınvestıtsııalyq jobalardy iske asyrý úderisterin eskere otyryp, ekonomıkaǵa qajetti kadrlarǵa turaqty boljam jasaýdy qamtamasyz etý, kolledjderdiń ınfraqurylymyn jańǵyrtý, óndiristik praktıkany uıymdastyrý tetikterin jetildirý jáne múddeli memlekettik organdarmen birlesip tehnıkalyq jáne kásiptik bilim berý salasyndaǵy zańnamany jetildirý jóninde usynystar ázirleý mindeti júkteldi.
Aıta keteıik, kolledjder sport nysandaryn sabaqtan tys ýaqytta jalǵa bere alady.
