Kolledjderde onlaın oqytý men akademııalyq utqyrlyq engiziledi
ASTANA. KAZINFORM – Kolledjder júıesine onlaın oqytýdy engizý usynyldy. Bul týraly Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine bilim berý jáne balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde Oqý-aǵartý mınıstri Ǵanı Beısembaev aıtty.
«Tehnıkalyq jáne kásiptik bilim berý uıymdarynda onlaın oqytý jáne akademııalyq utqyrlyq engiziledi. Qazirgi kezde eńbek naryǵynyń talaptaryna jaýap beretin mamandardy sapaly daıarlaýdy iske asyrý úshin kolledjder júıesine onlaın oqytýdy engizý usynyldy. Bul ózgeris óndiristen qol úzbeı, kadrlardy daıarlaý máselesin sheshýge baǵyttalǵan jáne stýdentterge oqý men eńbek qyzmetin úılestire otyryp, jeke baǵdarlamalar boıynsha oqýǵa múmkindik berý kózdelgen», - dedi Ǵ. Beısembaev.
Onyń aıtýynsha, mundaı tájirıbe AQSh, Kanada, Qytaı, Avstralııa jáne Ulybrıtanııa sııaqty elderde kezdesedi. Bul elderdegi onlaın oqytý bilim berý protsesteriniń tıimdiligin arttyrǵan. Onlaın oqytý formatyn engizýdiń negizgi maqsaty - kolledjderge sala sarapshylary men ozyq tehnologııalardy tarta otyryp, bilim berý baǵdarlamalaryn ıkemdi beıimdeý, al stýdentterge jumysty úzbeı-aq naqty jaǵdaılarda praktıkalyq daǵdylardy qalyptastyrýǵa jaǵdaı jasaý.
«Ekonomıkany tsıfrlandyrý jaǵdaıynda erekshe suranysqa ıe IT-mamandyqtarǵa basty nazar aýdarylady. Elimizde IT-sala sektory damý ústinde — qazirgi ýaqytta osy baǵyttar boıynsha 56 myń stýdent oqytatyn 227 kolledj daıyndyqty júrgizip keledi», - dedi mınıstr.
Budan buryn habarlanǵandaı, atalǵan zań jobasy aıasynda jekemenshik mektepterde oqıtyn áleýmettik osal otbasylardan shyqqan balalarǵa kómek beriledi.
