Kolledjderde oqý merzimi qysqarady - Ashat Aımaǵambetov
NUR-SULTAN. QazAqparat – Kolledjderde oqý merzimi qysqartylady. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.
«Tehnıkalyq jáne kásiptik bilim berý salasynda barlyq jasqa qajetti mamandyqtar boıynsha kolledjderde tegin oqýǵa múmkindik beriledi. 2017 jyldan beri tegin tehnıkalyq bilim berýmen qamtý ulǵaıdy. Biraq áli de 50 myńǵa jýyq stýdent aqyly bólimge oqýǵa túsedi. Osyǵan oraı 2025 jylǵa deıin jastardy kezeń-kezeńmen 100%-ǵa deıin tehnıkalyq bilimmen qamtý josparlanýda. Ol úshin memlekettik tapsyrys kólemi 50 myńǵa deıin kezeń-kezeńmen ulǵaıatyn bolady», - dedi mınıstr.
Onyń atap ótýinshe, kolledjderge akademııalyq derbestikti engizý boıynsha jumys qolǵa alyndy.
Búgingi kúni zańnamalyq deńgeıde ýákiletti organnyń kolledjderde oqý merzimderin belgileýi týraly norma alyp tastaldy.
«9-synyp negizinde kolledjge túskender úshin oqý merzimin úsh jarym jyldan 2 jylǵa deıin jáne 11-synyp negizinde eki jarym jyldan 1,5 jylǵa deıin qysqartý josparlanýda. Bul naryqqa kadrlardy daıarlaý merzimin qysqartyp, onyń sapasyn arttyryp, bilim baǵdarlamalaryn jańartýǵa múmkindik beredi», - dedi Ashat Aımaǵambetov.
Sonymen qatar ol «Jas maman» jobasy aıasynda 180 kolledjdiń ınfraqurylymyn jańǵyrtý bıyl aıaqtalatyndyǵyn aıtty.
«Jobanyń qorytyndysy boıynsha árbir óńirde damyǵan materıaldyq-tehnıkalyq bazasy, jańa oqý josparlary men baǵdarlamalary bar keminde 7 zamanaýı kolledj jumys isteıtin bolady. Jergilikti atqarýshy organdarmen birlesip, kolledjderdi senimgerlik basqarý tetigin damytýdamyz. Osy jumys ári qaraı jalǵasady», - dedi mınıstr.
