Kolledjderde 1 stýdentke bólinetin qarjy eki ese artady
ASTANA. KAZINFORM — Oqý-aǵartý mınıstri Ǵanı Beısembaev Úkimet otyrysynda Jumysshy mamandyqtar jyly aıasynda kásiptik-tehnıkalyq bilim berý uıymdaryn qarjylandyrý kólemi artatynyn jetkizdi.
— Tehnıkalyq jáne kásiptik bilim berý uıymdarynyń kópten kútken jańalyǵy — 2025 jylǵy 1 qyrkúıekten bastap jan basyna shaqqandaǵy qarjylandyrý mólsheri ulǵaıatyn bolady. Qoldanystaǵy jan basyna shaqqandaǵy normatıvtik qarjylandyrý ádistemesine sáıkes 1 stýdentti daıarlaý úshin bólinetin qarjynyń ortasha mólsheri 437 myń teńgeni qurasa, ol endi ortasha eseppen 912 myń teńgeni quraıtyn bolady, — dedi vedomstvo basshysy.
Onyń aıtýynsha, jańa qarjylandyrý normatıvi negizgi jáne yntalandyrý bólikterinen turady.
— Bul rette yntalandyrýshy tólemder naqty kórsetkishterge qol jetkizgen kolledjderge beriledi. Jańa qarjylandyrý júıesi — básekege qabiletti mamandar daıarlaýǵa, bilim uıymdaryn zamanaýı materıal-tehnıkalyq quraldarmen jabdyqtaýǵa jáne pedagogterdiń biliktiligin arttyrý kýrstaryn uıymdastyrýǵa múmkindik beredi, — dedi Ǵanı Beısembaev.
Buǵan deıin Prezıdent Jarlyǵymen 2025 jyl Jumysshy mamandyqtarynyń jyly dep jarııalanǵan edi.