Kolledjderdi qarjylandyrý kózderi ártaraptandyrylýy tıis – Ǵanı Beısembaev
ASTANA. KAZINFORM – Kolledjderdi jan basyna shaqqandaǵy qarjylandyrý normatıviniń mólsheri artady. Bul týraly Úkimet otyrysynda QR Oqý-aǵartý mınıstri Ǵanı Beısembaev málim etti.
«Sheteldik kolledjdermen strategııalyq áriptestikti damytý ınvestıtsııalardy tartý jáne oqytý men korporatıvtik basqarýdyń jańa tehnologııalaryn engizý arqyly iske asyrý josparlanyp otyr. Biz bul jumysty joǵary bilim mınıstrligimen birlesip júrgizemiz, sebebi qazirdiń ózinde álemniń 23 jetekshi joǵary oqý orny elimizde belsendi jumys atqaryp jatyr. Sondaı-aq joǵary oqý oryndarymen seriktestik kúsheıtiledi. Máselen, Soltústik makroóńirde – osy óńirdiń jetekshi kolledjderiniń strategııalyq seriktesi Sh.Ýálıhanov atyndaǵy Kókshetaý ýnıversıteti bolsa, sheteldik seriktesi Pensılvanııa ýnıversıteti (Rennsylvania state university) belgilengen. Nátıjesinde, kolledjderimiz stýdentter men oqytýshylardyń akademııalyq utqyrlyqty keńeıtý jolymen halyqaralyq yntymaqtastyqty damytady», - dedi Ǵ. Beısembaev.
Budan bólek ol kolledjderdi qarjylandyrý kózderi ártaraptandyrylýy tıis ekenin aıtty. Bul rette, memlekettik bilim berý tapsyrysy, kadrlardy daıarlaýǵa maqsatty tapsyrystar beretin jumys berýshiler, sondaı-aq tehnıkalyq jáne kásiptik bilim uıymdarynyń taýarlar men qyzmetterdi óndirý esebinen túsetin óz tabystary eskerilgen.
«Ekinshiden, bul jan basyna shaqqandaǵy normatıvke qatysty. Ol negizgi jáne jańa yntalandyrý bólikterinen turýy tıis. Bul turǵyda yntalandyrýshy tólemder teńdestirilgen kórsetkishter júıesiniń mánderine qol jetkizgen kezde beriletin bolady. Ony iske asyrý kezinde birinshi lıgaǵa jatatyn tehnıkalyq jáne kásiptik bilim uıymdarynda mamandyqtar tobyna baılanysty jan basyna shaqqandaǵy qarjylandyrý bir stýdentke 891 myń teńgeden 1,3 mln teńgege deıin arttyrylýy múmkin. Jalpy kolledjderdi jan basyna shaqqandaǵy qarjylandyrý normatıviniń mólsherin ulǵaıtý úshin 2025-2027 jyldarǵa arnalǵan qosymsha qajettilik kólemi 178,3 mlrd teńgeni quraıdy. Onyń ishinde 2025 jylǵa 53,7 mlrd teńge qajet. Qazirgi ýaqytta jan basyna shaqqandaǵy qarjylandyrý normatıviniń jańa ádistemesiniń jobasy Qarjy mınıstrligimen birge pysyqtalýda, qorytyndysy boıynsha respýblıkalyq bıýdjet komıssııasynyń qaraýyna engiziledi», - dedi vedomstvo basshysy.
