Kolledjder ustazdary Eýropa men Shyǵys Azııada taǵlymdamadan ótedi
Joba sheńberindegi jańalyqtardyń biri - arnaıy pánderdi kolledjderde aǵylshyn tilinde oqytý. Bul týraly QazAqparat tilshisi oblystyq bilim berý basqarmasyna silteme jasap habarlady.
Osy baǵytta bıyl oblystyń 3 kolledji 7 arnaıy pánderdi aǵylshyn tilinde oqytýdy bastady.
Jobany júzege asyrý úshin «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan» baǵdarlamasy qabyldandy.
Sondaı-aq, «Informatıka» pánin kezeń-kezeńimen aǵylshyn tilinde oqytýǵa kóshirý qolǵa alynýda. Oǵan «Kásipqor» holdınginiń aǵylshyn tilindegi 5 oqýlyǵy paılanylýda. Osy rette, jyl saıyn árbir kolledj kem degende eki arnaıy pánderdi aǵylshyn tilinde oqytýǵa kóshý jóninde túpkilikti sharalar qabyldaıdy.
Sonymen birge, bıyldan bastap kásiptik bilim berý salasyndaǵy ózekti másele - bilim alýshylardyń jumysshy mamandyǵy boıynsha birneshe biliktilikterdi qatar alyp shyǵýy mańyzdy.
Osy maqsatta, búgingi kúnde, 11 kolledjde 18 mamandyq boıynsha stýdentter birneshe, ıaǵnı 38 biliktilik boıynsha bilim alýda. Osyǵan oraı, árbir kolledj jyl saıyn kem degende bir mamandyq boıynsha birneshe biliktilikterdi qatar berýdi qamtamasyz etedi.
Kolledj stýdentterin kásipkerlikpen aınalysýǵa quzirettilikterin qalyptastyrý maqsatynda «Kásipkerlik negizderi» pánin 36 saǵattyq fakýltatıvtik kýrs retinde kolledjderde bıylǵy jyldan bastap engizildi. Fakýltatıvtik kýrsty engizý arqyly oblystyq kásipkerler palatasynyń suranysyn tolyq júzege asyryldy. Endigi kezek osy jańalyqtardy júıeli túrde oqý úderisine qosý úshin kolledjderdiń kadrlyq quramynyń sapasyn arttyrý mindeti tur.
Osy maqsatta, 2017 jyly «Kásipqor» holdınginiń uıymdastyrýmen modýldik bilim baǵdarlamalary boıynsha 240 ınjener-pedagog jáne 11 kolledj dırektory halyqaralyq menedjment 3 deńgeıli biliktilik arttyrý kýrstarynan ótti. Kelesi jyly bul sandy 310-ǵa deıin arttyrý (240-tan) jóninde «Kásipqor» holdıngimen kelissózder júrgizilýde, onyń ishinde aǵylshyn tilinde oqytylatyn CLIL baǵdarlamasyna qatysýshylardyń sany artady.
Qyzylorda kolledjderiniń ınjener-pedagog kadrlaryn aǵylshyn tilinde ótetin taǵylymdamalarǵa eýropalyq jáne Shyǵys Azııa memleketterine jiberý josparlanǵan. Bul buryn-sońdy bolmaǵan tájirıbe. Osylaısha, qazir kolledjderdiń 15 pedagogi Ulybrıtanııa, Fınlıandııa, Chehııa jáne Malaızııa memleketterine taǵylymdamadan ótý úshin baratyn bolady. Bul jumys QR Prezıdentiniń «Bolashaq» baǵdarlamasynyń tájirıbesi negizinde júrgizilýde jáne keler jyly da jalǵasady.
Toqtalyp óter jaıt, «Barshaǵa arnalǵan tegin kásibı-tehnıkalyq bilim» máseleleri Elbasynyń Ult jospary - bes ınstıtýtsıonaldyq reformany júzege asyrý jónindegi 100 naqty qadam eńbeginiń 77-qadamynda naqty aıtylǵan. Onda ekonomıkanyń alty negizgi salasy úshin on aldyńǵy qatarly kolledj ben on joǵary oqý ornynda bilikti kadrlardy ázirleý, keıinnen bul tájirıbeni elimizdiń basqa oqý oryndaryna taratý máselesi mindettelgen bolatyn.
