Kolledjder suranysy joq mamandar daıarlaıdy – Úkimet basshysy
Ustazdarmen kezdesý barysynda mektepterdiń materıaldyq-tehnıkalyq jaǵdaıyn jańartý jáne basqa da ózekti máseleler kóterildi. Úkimet basshysynyń orynbasary memleket tarapynan áleýmettik salalarǵa qoldaý kórsetilip jatqanyn atap ótti.
«Biz bilimdi urpaqty tárbıeleýimiz kerek. Elbasymyz jáne Memleket basshysy bul máseleni erekshe nazarda ustaýda. Búginde »Muǵalimniń mártebesi« jónindegi zań jobasy Parlamentte qaralýda. Pedagogtardyń quqyqtary qorǵalatyn bolady»,- dedi vıtse-premer.
Sonymen qatar, Berdibek Saparbaev óskeleń urpaqtyń rýhanııatyna da asa kóńil bólý qajettigin aıtty.
«Nege jastar arasynda quqyqbuzýshylyq pen sýıtsıd sany ósýde? Óıtkeni balalar mektepten keıin nemen aınalysatynyn bilmeıdi. Ata-analar jumys istep jatqanda, bala óz bilgenimen júredi. Jastardyń qoly bos bolmaýy kerek. Olar sportpen, ónermen aınalysýy tıis. Ónegeli urpaq degenimiz mine, osy. Bizde jetkilikti áleýmettik nysandar salyndy, olardyń barynsha júktelýin qamtamasyz etý kerek. Sonyń ishinde keshki jáne demalys kúnderi jumys isteıtin úıirmeler ashý qajet. Biz tıisti jumystardy júzege asyrsaq, sol kezde ǵana bizdiń balalarymyz tárbıeli jáne deni saý bolady, quqyqbuzýshylyq jasamaıdy», - dep atap ótti Saparbaev.
Vıtse-premer jıynda kolledjderdiń jumysyn da synǵa aldy.
«Jyl saıyn kolledjder myńdaǵan mamandar daıarlap shyǵarady. Al, olar jumyssyzdardyń qataryn tolyqtyryp júr. Sebebi, kolledj basshylyǵy kimderdi oqytyp jatqanyn nemese qalaı oqytyp jatqanyn qadaǵalamaıdy. Birneshe jyl buryn tájirıbe retinde árbir oqý bitirýshiniń jumysqa ornalasqanyn zeınetaqy aýdarymdary týraly anyqtamamen tirkeýge alynsyn degen bastamany engizgen edik. Alaıda, bul jerde de qýlyqtar tabyldy. Oqý bitirýshi bir-eki aı ǵana jumys istep, anyqtama qaǵazyn ótkizedi, boldy. Óıtkeni kolledjder suranysta joq mamandyqtar daıarlaıdy, ondaǵy bilim sapasy da tómen. Sondyqtan bizde kadrlar tapshylyǵy týyndaıdy», - dedi Berdibek Saparbaev.
Odan bólek, vıtse-premer Shymkent qalalyq ákimdiginde áleýmettik-eńbek salasyna mindetti áleýmettik medıtsınalyq saqtandyrýdy engizý boıynsha jınalys ótkizdi.
Eske salaıyq, búgin QR Premer-Mınıstriniń orynbasary Berdibek Saparbaev bastaǵan Úkimet múshelerinen quralǵan jumys toby Shymkentke saparmen kelgen bolatyn. Top quramynda Eńbek jáne halyqty áleýmettik qorǵaý mınıstri Birjan Nurymbetov, Densaýlyq saqtaý mınıstri Eljan Birtanov, Bilim jáne ǵylym mınıstri Ashat Aımaǵambetov, Mádenıet jáne sport vıtse-mınıstri Úrken Bısaqaev, Aqparat jáne qoǵamdyq damý vıtse-mınıstri Danııar Esınder bar. Sapardyń negizgi maqsaty - QR Prezıdentiniń halyqqa arnaǵan Joldaýyn túsindirý.
