Kolledjder sport nysandaryn sabaqtan tys ýaqytta jalǵa bere alady
ASTANA. KAZINFORM — Qazaqstan kolledjderine bilim berý protsesinen tys ýaqytta dene shynyqtyrý-saýyqtyrý jáne sport nysandaryn jalǵa berý quqyǵy berildi, dep habarlaıdy Oqý-aǵartý mınıstrliginiń baspasóz qyzmeti.
Tıisti ózgerister «Qazaqstan Respýblıkasynyń keıbir zańnamalyq aktilerine áleýmettik zańnamany jetildirý máseleleri boıynsha ózgerister men tolyqtyrýlar engizý týraly» Zańy aıasynda «Bilim týraly» Zańǵa engizildi.
Osyǵan deıin mundaı múmkindik tek jalpy orta bilim berý uıymdarynda bolǵan. Endi kolledjderdiń sport zaldary, basseınderi, stadıondary jáne ózge de sport nysandary oqý sabaqtary aıaqtalǵannan keıin eldi meken turǵyndarynyń paıdalanýyna usynylatyn bolady.
— Jalǵa berýden túsetin kiristerdi kolledjder sport nysandaryn kútip-ustaýǵa jáne jóndeýge, zamanaýı sporttyq qural-jabdyqtar satyp alýǵa, sondaı-aq materıaldyq-tehnıkalyq bazany damytýǵa baǵyttaı alady, — delingen habarlamada.
Qabyldanǵan ózgerister memlekettik kolledjderdiń sport ınfraqurylymyn tıimdi paıdalanýdy qamtamasyz etip, buqaralyq sportty damytýǵa, salaýatty ómir saltyn nasıhattaýǵa jáne Qazaqstan azamattarynyń dene shynyqtyrýmen jáne sportpen shuǵyldanýyna qolaıly jaǵdaılardyń qoljetimdiligin arttyrýǵa yqpal etedi.
Buǵan deıin Almatyda kolledjge túsý tolyq tsıfrlyq formatqa kóshkenin jazǵanbyz.
