Kolledjden keıin ýnıversıtetke túsý: UBT tapsyrý tártibi qandaı

2019 jyldan bastap kolledj túlekteri joǵary oqý oryndaryna túsý úshin Ulttyq biryńǵaı testileýden (UBT) ótedi. Kolledj túlekterine arnalǵan keshendi testileý (KTA) ótkizilmeıdi.

UBT-ǵa qashan tirkelýge bolady?

Kolledj túlekteri qańtar, naýryz, negizgi jáne tamyz aılarynda ótetin UBT-ǵa qatysa alady. Ótinishter app.testcenter.kz saıty arqyly qabyldanady. Testileý quny — 5 640 teńge.

Qandaı UBT tapsyrý kerek?

Bul tańdaǵan mamandyqqa jáne oqý merzimine baılanysty.

1. Qysqartylǵan oqý merzimimen (óz mamandyǵy nemese sabaqtas baǵyt boıynsha):

• Aqyly bólimge túsý úshin UBT tapsyrý mindetti emes. Qabyldaý joǵary oqý ornyndaǵy áńgimelesý nátıjesi boıynsha júzege asyrylady.

• Memlekettik grant konkýrsyna qatysý úshin negizgi UBT tapsyrý qajet:

  • ádettegi baǵyttar boıynsha — 2 pán (jalpy kásiptik jáne arnaıy);

  • shyǵarmashylyq baǵyttar boıynsha — 1 arnaıy pán. Shyǵarmashylyq emtıhandy joǵary oqý orny ótkizedi.

2. Tolyq oqý merzimimen (basqa mamandyq boıynsha):

• Aqyly bólimge túsý úshin UBT-nyń tórt kezeńiniń birin tańdaýǵa bolady.

• Memlekettik grant konkýrsyna qatysý úshin negizgi UBT tapsyrý qajet.

• Ádettegi baǵyttar boıynsha — 5 pán (3 mindetti jáne 2 beıindik);

• Shyǵarmashylyq baǵyttar boıynsha — 2 pán («Qazaqstan tarıhy» jáne «Oqý saýattylyǵy»). Buǵan qosa shyǵarmashylyq emtıhandy joǵary oqý orny ótkizedi.

— Bul rette qysqartylǵan oqý merzimi men memlekettik granttardyń tańdaǵan mamandyǵyńyz boıynsha qarastyrylǵanyn aldyn ala joǵary oqý ornynan naqtylap alyńyz. Mysaly, medıtsına salasynda qysqartylǵan oqý merzimi «Farmatsııa» jáne «Meıirger isi» mamandyqtary boıynsha ǵana qarastyrylǵan. UBT-ǵa ótinish bermes buryn tańdaǵan mamandyǵyńyzdy, oqý merzimin jáne joǵary oqý ornynyń qabyldaý talaptaryn anyqtap alǵan jón, — delingen habarlamada.

Osyǵan deıin qandastarǵa grantqa túsý úshin UBT-dan shekti ball jınaý mindetti emes ekenin jazǵanbyz.