Kolledjden kásiporynǵa deıingi jol: stýdentter óndiristik ortaǵa qadam basty
ASTANA.KAZINFORM – Búgin elordada Astana qalasy ákimdiginiń «Kólik jáne kommýnıkatsııalar joǵary kolledji» men «Astana elektrotehnıkalyq zaýyty» arasynda kásiptik baǵdar berý baǵytyndaǵy «Mamandyqqa jol: kolledjden óndiriske» atty kezdesýi ótti.
Іs-sharanyń negizgi maqsaty – kolledj stýdentterin naqty óndiristik ortaǵa beıimdeý, olardyń kásibı mashyqtaryn qalyptastyrý jáne bolashaq mamandyǵyn sanaly tańdaýǵa jol ashý. Sonymen qatar kezdesýdiń mańyzdy maqsaty – birneshe jyldan beri kásiptik bilim berýdi damytýǵa qoldaý kórsetip kele jatqan kolledjdiń áleýmettik seriktesi Astana elektrotehnıkalyq zaýytymen yntymaqtastyqty nyǵaıtý.
Atalǵan is-sharaǵa kolledj basshylyǵy, zaýyt ókilderi, óndiris mamandary men oqý ordasynyń ekinshi kýrs stýdentteri qatysty. Kezdesý barysynda qatysýshylar zaýyt aýmaǵymen tanysyp, óndiristik tsehtardy aralady.
Kezdesý aıasynda kolledj dırektorynyń oqý-óndiristik jumys jónindegi orynbasary Aıgerim Erdenova quttyqtaý sóz sóılep, bilim ordasynyń 80 jyldyq tarıhynda el ekonomıkasy úshin myńdaǵan bilikti maman daıarlaǵanyn atap ótti. Ol sondaı-aq 2025 jyldyń «Jumysshy mamandyqtar jyly» bolyp jarııalanýy tehnıkalyq jáne qoldanbaly baǵyttaǵy mamandyqtardyń mańyzyn arttyra túskenin jetkizdi.
– Tehnıkalyq bilim berý – eldiń turaqty damýynyń kepili. Biz bilim men óndiris arasyndaǵy baılanysty nyǵaıta otyryp, jastardyń kásibı qalyptasýyna úles qosýǵa daıynbyz, – dedi ol.
Óz kezeginde zaýyttyń óndiris jónindegi dırektory Darhan Maqutov kásiptik baǵdar berý bastamalaryn qoldaýǵa daıyn ekenin aıtyp, oqý orny men kásiporyn arasyndaǵy seriktestikti jalǵastyrýdyń mańyzyn atap ótti.
– Bizdiń esigimiz jastarǵa árdaıym ashyq. Bolashaq energetıkterge salynǵan ınvestıtsııa – eldiń turaqty damýyna salynǵan úles. Biz jas mamandarǵa tek tájirıbe berip qana qoımaı, olarǵa senim artamyz, – dedi zaýyt ókili.
Kezdesý aıasynda stýdentterge zaýyttyń damý tarıhy men jetistikteri tanystyrylyp, tehnıkalyq mamandyqtar boıynsha jas mamandarǵa qoıylatyn qazirgi talaptar týraly málimet berildi. Sondaı-aq, kásiptik sheberlik synyby uıymdastyrylyp, stýdentter elektrotehnıka jáne elektrmen jabdyqtaý salasyndaǵy mamandardyń jumysymen jaqyn tanysýǵa múmkindik aldy.
Sharanyń praktıkalyq bóligi de erekshe nazarda boldy. Stýdentter zaýytta eńbek jolyn bastaǵan túlektermen ashyq formatta pikir almasyp, óndiristik tájirıbege qatysty suraqtaryn qoıdy. Jas mamandar óz tájirıbelerimen bólisip, kásibı baǵyt tańdaýdaǵy jeke mysaldaryn keltirdi. Mundaı dıalog stýdentterge baǵyt-baǵdar berip, motıvatsııany arttyrýǵa yqpal etti.
Kezdesý sońynda keri baılanys sessııasy ótkizilip, qatysýshylar alǵan áserlerin ortaǵa saldy. Oqý orny men óndiristik kásiporyn ókilderi arasynda odan ári yntymaqtastyq ornatý joldary talqylandy. Іs-shara ujymdyq estelik foto túsirýmen qorytyndylandy.
«Mamandyqqa jol: kolledjden óndiriske» bastamasy tehnıkalyq baǵytta bilim alyp jatqan jastardyń bolashaq kásibı baǵytyn aıqyndap, eńbek naryǵyndaǵy naqty talaptarmen erte tanysýyna jol ashady. Sonymen qatar bul bastama óndiris pen bilim berý arasyndaǵy baılanysty nyǵaıtýǵa, sapaly kadrlar daıarlaýǵa jáne otandyq ónerkásiptiń áleýetin arttyrýǵa yqpal etedi.
Eske sala keteıik, byltyr kolledj túlekteriniń 81 paıyzy jumyspen qamtylǵanyn jazǵanbyz.