Kolledj túlekteriniń bilimi jumys berýshilerdiń talaptaryna sáıkes kele bermeıdi – Bektenov
ASTANA. KAZINFORM — Jańa óndiristerdi ashý kezinde bilikti jumysshylardyń jetispeıtinin kórip otyrmyz. Bul týraly Úkimet otyrysynda Premer-Mınıstr Oljas Bektenov málim etti.
«Memleket basshysy 2025 jyldy Jumysshy mamandyqtary jyly dep jarııalady. Bul jumysshy kásipteriniń bedelin arttyrý jáne zamanaýı ımıdjin qalyptastyrý jolynda mańyzdy qadam bolmaq. Prezıdent óz Joldaýynda atap ótkendeı, kásibine adal ári jaýapkershilikpen qaraǵan adam qashanda laıyqty baǵasyn alady. «Adal azamat – Adal eńbek – Adal tabys» qaǵıdaty is júzine asýǵa tıis. Sondyqtan eńbek naryǵynyń, bıznestiń jáne bilim alýshy jastardyń múddeleri men qajettilikterin eskeretin júıeli sharalar keshenin ázirleý kerek. Bul rette qazirgi zamannyń syn-qaterlerin eskere otyryp, bilikti kadrlar daıarlaý – memlekettik saıasattyń mańyzdy basymdyǵy bolyp qala bermek. Ádette, kóptegen elderde alǵashqy jumysshy mamandyǵyn jalpyǵa qoljetimdi ári aqysyz negizde alýǵa bolady. Mundaı túlekterge eńbek naryǵynda suranys ta joǵary», - dedi Oljas Bektenov.
Onyń paıymynsha, elimizdegi kolledj túlekteriniń bilimi men daǵdylar deńgeıi kóbinese jumys berýshilerdiń talaptaryna, jastardyń óz suranystaryna sáıkes kele bermeıdi.
«Jańa óndiristerdi ashý kezinde bilikti jumysshylardyń jetispeıtinin kórip otyrmyz. Al, jastar bolsa, kolledjderde oqýǵa qulyqsyz. Sońǵy jyldary kásiptik tehnıkalyq bilim berý júıesin damytýda birqatar progressıvti qadamdar jasaldy. Qazir kolledjder jumysshy mamandyqtary boıynsha tegin oqytady. 3 jyl ishinde kadrlar daıarlaýǵa arnalǵan memlekettik tapsyrys kólemi aıtarlyqtaı ulǵaıdy. Eger buǵan deıin kolledjderge bıýdjet esebinen jyl saıyn 93 myńǵa jýyq stýdent qabyldanyp kelse, bıyl olardyń sany 142,5 myńǵa deıin jetti», - dedi Úkimet basshysy.
