Kolledj túlekteriniń qansha paıyzy jumysqa ornalasyp jatyr

ASTANA. QazAqparat – Búginde memlekettik tapsyryspen oqýdy aıaqtaǵan kolledj túlekteriniń 66 paıyzy jumysqa ornalasqan. Oqý-aǵartý mınıstrliginiń áleýmettik jelidegi paraqshasynda ótken onlaın-brıfıngide Tehnıkalyq jáne kásiptik bilim departamentiniń basshysy Altaı Rahımberlın osylaı málimdedi, dep habarlaıdy QazAqparat tilshisi.

«Biz jyl saıyn jumyspen qamtý máselelerine monıtorıng jasap otyramyz. Eńbek mınıstrliginiń aqparatyna sáıkes, memlekettik tapsyryspen oqýdy aıaqtaǵan kolledj túlekteriniń 66 paıyzy qazirgi tańda jumysqa ornalasqan. Odan keıin joǵary oqý oryndarynda oqýyn jalǵastyratyndar men áskerge baratyndar bar», - dedi Altaı Rahımberlın.

Departament basshysy brıfıng aıasynda akademııalyq derbestik alǵan kolledjder bilim berý baǵdarlamasyn jergilikti kásiporyndarmen birlesip ázirleıtinin aıtty.

«Bolashaqta akademııalyq derbestik aıasynda jumys isteıtin kolledjder kásiporyndarmen birlesip, bilim berý baǵdarlamasyn ázirleıtin bolady. Osynyń negizinde kásiporyndar ózderine qajetti mamandardy iriktep alady», - dep toqtaldy Altaı Rahımberlın.

Budan ózge, ol akademııalyq erkindik alǵan kolledjder oqý merzimderin qysqarta alatynan atap ótti. Demek, qazirgi tańda bul merzim 3 jyl 10 aı bolsa, aldaǵy ýaqytta ol 2 jylǵa deıin qysqarmaq.