Kolledj túlekteriniń biliktiligin táýelsiz uıymdar sertıfıkattaıdy
ASTANA. QazAqparat - Parlament Májilisiniń jalpy otyrysynda palata depýtattary «Bilim týraly» QR Zańyna ózgerister men tolyqtyrýlar engizý týraly» zań jobasyn birinshi oqylymda maquldady, dep habarlaıdy QazAqparat tilshisi.
«2017 jyldyń maýsym aıynda Parlament depýtattarynyń bastamasymen Qazaqstannyń keıbir zańnamalyq aktilerine bilim máseleleri boıynsha ózgerister men tolyqtyrýlar engizý týraly zań jobasy usynylǵan bolatyn. Qujat ekonomıkamyzdy bilikti kadrlarmen qamtamasyz etý jáne halyqaralyq talaptarǵa saı kásiptik bilim berý baǵdarlamalaryn jańartý aıasynda qoıylǵan mindetterdi júzege asyrýǵa baǵyttalǵan», - dep atap ótti depýtat Baqytgúl Hamenova zań jobasy boıynsha baıandamasynda.
Onyń sózine qaraǵanda, jalpy ózgertýler men tolyqtyrýlar tehnıkalyq jáne kásiptik bilim beretin oqý oryndary qyzmetiniń basty tórt baǵytyn retteýge negizdelgen. Atap aıtsaq, oqý baǵdarlamalaryn modýldik ázirleý, dýaldy oqytýdy damytý, sondaı-aq biliktilikti sertıfıkattaýdy básekelesti ortaǵa berý, oqý oryndarynyń qarjylyq jaǵdaıy eskerilgen.
«Modýldik oqý baǵdarlamalaryn ázirleý boıynsha toqtalsaq, barshaǵa arnalǵan tegin tehnıkalyq jáne kásiptik bilim jobasynyń negizgi maqsaty - jumyssyz júrgen, oqý oryndaryna túse almaǵan, ózin-ózi jumyspen qamtyǵan, az qamtylǵan otbasydan shyqqan jastardyń jumysshy mamandyǵyn tegin alýyna múmkindik jasaýǵa baǵyttalǵan. Barlyq mamandyqtar boıynsha jaýapty mınıstrlik oqý baǵdarlamalaryn qaıta qarastyryp, jańa modýldik oqý baǵdarlamalaryn ázirledi. Jańa baǵdarlamanyń ereksheligi - bir mamandyq aıasynda bir biliktiliktiń ornyna, úsh biliktilikke deıin alýy. Zań jobasynda atalǵan modýldik oqý baǵdarlamalaryn zańnamalyq túrde bekitip, oqý úrdisine engizý kózdelgen. Bul engizilgen jańashyldyq jalpy jumysshy mamandyǵynyń bedelin arttyrady degen oıdamyz», - dedi B. Hamenova.
Budan bólek depýtat dýaldy oqytýdy damytý boıynsha ekinshi baǵytqa toqtalyp ótti.
«2012 jyldan bastap Qazaqstanda dýaldy oqytý júıesi engizilýde. Búgingi kúni osy baǵytta zańnamalyq jáne ınstıtýtsıonaldyq baza qalyptastyrylǵan. Alaıda, áli de bolsa tálimger uǵymy, onyń eńbekaqysyn tóleý týraly normalary eshqandaı zańda nemese quqyqtyq aktilerde kórsetilmegen. Osyǵan baılanysty zań jobasy aıasynda Eńbek kodeksine «tálimger», «óndiristik oqytý», «kásiptik tájirıbe» uǵymdary engizilgen», - dedi ol.
Al úshinshi baǵyt biliktilikti sertıfıkattaýdy básekelestik ortaǵa berýge negizdelgen. Búginde kolledjderdi bitirýshi túlekter qorytyndy attestattaý boıynsha memlekettik emtıhan tapsyrady jáne dıplomdyq jobany qorǵap qana qoımaı, kásiptik daıarlyq deńgeıin baǵalaý men biliktilikti berý boıynsha teorııalyq test pen tájirıbelik emtıhan tapsyrady.
«ıAǵnı bul birin-biri qaıtalaýdy bildiredi. Osy oraıda zań jobasy aıasynda kolledj túlekteriniń kásibı daıarlyq deńgeıin baǵalaý jáne biliktilikti berý rásimin qorytyndy attestattaýdan alyp tastap, ony básekelestik ortaǵa berýdi usynamyz. Halyqaralyq tájirıbege súıensek, túlekterdiń biliktiligin sertıfıkattaýdy táýelsiz uıymdar júzege asyrady», - dedi B. Hamenova.
