Kolledj túlekteriniń basym bóligi jumyssyz júr - Abylaı Myrzahmetov
ASTANA. QazAqparat - "Atameken" UKP arnaıy taldaý júrgizip, kolledj túlekteriniń jumysqa turý deńgeıin anyqtady, dep habarlaıdy QazAqparat tilshisi.
"Búginde respýblıka boıynsha 100 mlrd teńgeden astam qarjy kolledjderge jumsalady. Bizde 800-den artyq kolledj bar. Alaıda ol jerde oqyǵan jastardyń jartysynan kóbi jumysqa tura almaı jatady. Al, statıstıka boıynsha basqa málimet beriledi. Biraq bizdiń taldaýymyzǵa sáıkes, kolledj túlekteriniń basym bóligi jumyssyz júredi. Bylaısha aıtqanda, kásibı-tehnıkalyq bilim berý oshaqtary suranysy joq mamandardy daıarlaıdy", - dedi «Atameken» Ulttyq kásipkerler palatasynyń basqarma tóraǵasy Abylaı Myrzahmetov QazAqparat tilshisine bergen suhbatynda.
Onyń aıtýynsha, "Atameken" UKP arnaıy taldaý jumystaryn ótkizdi. Jaqyn arada palata músheleri Premer-Mınıstrmen kezdesip, barlyq máselelerdi talqylaýdy josparlap otyr. Suranysy bar maman daıarlaý joldaryn da usynbaqshy. "Kolledjde ondaı mamandardy daıarlaý úshin ne isteý kerek? Jańaǵy 100 mlrd teńgeniń memlekettik tapsyrysyn taratqanda túlekterdiń jumysqa turý kórsetkishin basty nazarǵa alý qajet. Arnaıy reıtıng bolady. Eger dál osy kórsetkishpen baǵalasaq, kolledjderdiń ózderi suranysy bar maman daıarlaýǵa tyrysady. Áıtpese, qazir olar aqshany alady da, ózine júktelgen oqytý sharalaryn atqara salady. Sonymen támam. Máselen, biz Ońtústik Qazaqstan oblysynda zertteý júrgizdik. Olar jastardyń jumysqa turý deńgeıi 70 protsent dep otyr. Alaıda jas maman úsh aıdaı jumys isteıdi de, shyǵyp ketedi. Sonda úsh aıdy ǵana alyp otyr. Biz bolsaq, eki jyldyq merzimdi aldyq. Tekseris boıynsha jastardyń 30 protsenti, keıbir aýdandarda 10-aq protsenti ǵana turaqty jumysqa turdy. Qalǵany dıplom bolsa da, jumyssyz júr. Biz bunyń barlyǵyn Úkimet basshysyna jetkizemiz", - dep atap kórsetti A.Myrzahmetov.
Palata basshysynyń sózine qaraǵanda, reıtıngtiń arqasynda ata-analar óz balalaryn jumysqa turǵyzý kórsetkishi joǵary kolledjderge jibere alady. Al bilim jáne ǵylym mınıstrligi bıýdjet qarajatyn tıimdi jumsaıdy.
Aıta keteıik, búgin Astanada QR Prezıdenti janyndaǵy Sheteldik ınvestorlar keńesiniń 31-shi plenarlyq otyrysy ótti. Memleket basshysy Nursultan Nazarbaev kelesi otyrystyń taqyrybyn adam kapıtalyn damytý máselesine arnaýdy usyndy. Sebebi sheteldik ınvestorlardyń ózderi atalǵan problemany kóterip otyr.
«Birinshiden, adam kapıtalyn áli de jaqsartý qajet. Ásirese, qazirgi ozyq tehnologııalardy eskere otyryp, maman daıarlaý máselesine basa nazar aýdarǵan jón. Sebebi sapaly jumys kúshi áli de jetispeı jatyr. Ondaı problemaǵa sheteldik ınvestorlar ǵana emes, jergilikti kompanııalar da tap bolýda. Dál osy másele bıznesti damytýǵa qolbaılaý bolyp otyr. Ekinshiden, jańa Ekologııalyq kodeksti birlesip ázirleý kerek. Búginde Qazaqstan qorshaǵan ortany qorǵaý máselesine erekshe kóńil bólip keledi. Alaıda normatıvtik aktilerdi ázirlegende qazaqstandyq óndiristiń jahandyq básekelestigin de eskerý kerek. Sonyń nátıjesinde ekonomıkalyq ósim de bolady. Bizdińshe, aıyppuldardy salǵan kezde naqty dálelder bolýy qajet. Sosyn ekonomıkalyq zalaldy janama baǵalaýdy alyp tastaǵan durys», - deıdi «Sheteldik ınvestorlardyń qazaqstandyq keńesi» qaýymdastyǵynyń basshysy Agrıs Preımanıs.
