Kolledj-tehnıkýmdardyń 90 myńnan astam túlegi óz mamandyǵy boıynsha jumysqa ornalasqan
ASTANA. KAZINFORM — Qazaqstanda tehnıkalyq jáne kásiptik bilim berý túlekteriniń jumysqa ornalasý kórsetkishi aıtarlyqtaı ósti. Sońǵy úsh jylda mamandyǵy boıynsha jumysqa ornalasqan túlekter sany 26%-ǵa artyp, 90,6 myń adamǵa jetti. Bul týraly Oqý-aǵartý mınıstri Juldyz Súleımenova Úkimet otyrysynda baıandady.
Mınıstrdiń aıtýynsha, TjKB júıesine memlekettik qoldaý da kúsheıip keledi. 2025–2026 oqý jylynda salany qarjylandyrý 424,9 mlrd teńgege jetip, úsh jylda 34,1%-ǵa ósti.
Stýdentter sany artty
Tehnıkalyq jáne kásiptik bilim berý uıymdaryndaǵy stýdentter kontıngenti de ulǵaıyp keledi. Úsh jyl ishinde bilim alýshylar sany 542,7 myń adamnan 556,2 myń adamǵa deıin ósti. ıAǵnı, ósim 13,5 myń adamdy nemese 2,5%-dy qurady.
Memlekettik bilim berý tapsyrysynyń kólemi de jyl saıyn artyp otyr.
Atap aıtqanda, 2023-2024 oqý jylynda memlekettik bilim berý tapsyrysy 344,9 myń oryndy qurasa, 2024-2025 oqý jylynda bul kórsetkish – 374,3 myń orynǵa jetti. Al 2025-2026 oqý jylynda – 393,3 myń orynǵa deıin ulǵaıdy.
Osylaısha, úsh jylda memlekettik bilim berý tapsyrysy 48,4 myń orynǵa nemese 14%-ǵa artqan.
Stıpendııa eki esege kóbeıdi
Mınıstrdiń aıtýynsha, stýdentterdi áleýmettik qoldaý sharalary da keńeıtildi.
– Stıpendııa mólsheri 2 esege ósip, 43 myń teńgege jetti. Jataqhanamen qamtamasyz etý deńgeıi 10%-ǵa artyp, 95,4%-dy qurady, – dedi spıker.
Bul kórsetkishter TjKB salasyn qarjylandyrý, kadr daıarlaý jáne stýdentterdi áleýmettik qoldaý kóleminiń artqanyn kórsetedi.
Kolledj ben tehnıkým túlekteriniń sany kóbeıdi
Tehnıkalyq jáne kásiptik bilim berý uıymdaryn bitirýshiler sany da turaqty ósim kórsetip otyr. 2023-2024 oqý jylynda 141,3 myń túlek bolsa, 2025-2026 oqý jylynda olardyń sany 169,2 myń adamǵa jetti. Bul 19,8%-ǵa kóp.
Onyń ishinde jumysshy biliktilikteri boıynsha túlekter sany 47,5 myńnan 60,1 myń adamǵa deıin, ıaǵnı 26,5%-ǵa ósti.
Orta býyn mamandarynyń sany 88,2 myńnan 103,2 myń adamǵa deıin artty. Ósim – 17%.
Al qoldanbaly bakalavrıat baǵdarlamalary boıynsha túlekter sany 5,6 myńnan 5,9 myń adamǵa deıin kóbeıdi.
– Búginde elimizde 763 kolledjde 556 myńnan astam stýdent bilim alady. Sońǵy úsh jylda jumysshy biliktilikteri boıynsha memlekettik tapsyrys 3,7%-ǵa ósip, 131,4 myń orynǵa jetti. Kolledjderge qabyldaý 5,8%-ǵa artyp, 57,8 myń stýdentke artty, – dedi Oqý-aǵartý mınıstri.
Mamandyǵy boıynsha jumysqa ornalasqandar kóbeıdi
Tehnıkalyq jáne kásiptik bilim berý túlekteriniń eńbek naryǵyndaǵy suranysy artyp keledi. Sońǵy úsh jylda mamandyǵy boıynsha jumysqa ornalasqan túlekterdiń sany 72 myńnan 90,6 myń adamǵa deıin kóbeıgen.
Bul kórsetkishtiń 26%-ǵa óskenin kórsetedi. Al jalpy jumysqa ornalasqan túlekter sany 92,8 myńnan 112,7 myń adamǵa deıin artqan.
– Endigi mindet – osy múmkindikterdi eńbek naryǵynyń naqty suranysyna jaýap beretin nátıjege aınaldyrý. Osy maqsatta 2025–2027 jyldarǵa arnalǵan TjKB júıesin transformatsııalaý jol kartasy iske asyrylýda. Onyń negizgi baǵyttary – kadr daıarlaýdy ekonomıka suranysyna beıimdeý, bıznestiń qatysýyn keńeıtý, bilim berý mazmunyn jańartý jáne jumysshy kásipteriniń bedelin arttyrý, – dedi J. Súleımenova.
Jalpy jumysshy mamandyqtary boıynsha túlekterdiń jumysqa ornalasý deńgeıi 68 paıyzdy qurap, 3 paıyzǵa artqan.
Aıta keteıik, búgin Úkimet otyrysynyń kún tártibine jumysshy mamandyqtary boıynda kadrlar daıyndaýdaǵy jańa tásilder taqyryby shyǵarylyp otyr.
