Kolledj stýdentteriniń jeke bıznes ashýyna múmkindik beriledi – Ashat Aımaǵambetov

ASTANA. QazAqparat – Kolledj stýdentterine ózderiniń startap jobalaryn júzege asyrýy úshin qosymsha múmkindik beriledi. Bul týraly elordada ótip jatqan «WorldSkills» respýblıkalyq chempıonaty barysynda Oqý-aǵartý mınıstri Ashat Aımaǵambetov aıtty, dep habarlaıdy QazAqparat tilshisi.

«Keshe men 7, 8, 9, 10 synyp oqýshylarymen kezdestim. Olar shyn máninde óte daryndy balalar. Tipti olardyń daıyndyq deńgeıi meni tań qaldyrdy. Keshe biz «Top-100 kolledj stýdentteri» jobasynyń úzdik stýdentterin marapattadyq. Kolledjde oqyp júrgen kóptegen balalar oqý aıaqtalǵannan keıin naryqqa shyǵýǵa jáne jumys izdeýmen shektelmeıdi. Biz olarǵa bıznes ıdeıalaryn júzege asyrý úshin qajetti quzyret beremiz. Osylaısha olar ózderiniń startap jobalaryn damytýyna múmkindik alady», - dedi mınıstr.

Munymen qatar, Ashat Aımaǵambetov kolledjderde bıznes-ınkýbatorlar ashylyp jatqanyn atap ótti.

«Biz bul jobanyń sátti iske asyp jatqanyn kórip otyrmyz. Biz kolledjderde bıznes-ınkýbatorlar ashamyz. Máselen, slesarlar, santehnıkter sııaqty mamandar qazir suranysqa ıe. Endi olar ózderiniń jeke kásipkerlerin ashyp, bıznesterin damyta alady. Syrtqa shyǵyp, jumys izdeýdiń qajeti joq. Osyǵan baılanysty kásipkerlik daǵdylardy damytý jáne osyndaı uıymdardy ashý biz úshin mańyzdy baǵyt», - dep túıindedi ol.

Eske sala keteıik, bul kúnderi elordada kolledj stýdentteri arasynda «WorldSkills» respýblıkalyq chempıonaty ótip jatyr.