Kolledj stýdentterine artyq pánderdi tyqpalaýdy qoıý qajet - depýtat Ábsattarov
ASTANA. QazAqparat - QR Parlament Májilisiniń depýtaty Keńes Ábsattarov Úkimet basshysynyń atyna saýal joldady. Onyń aıtýynsha, búginde jumysshy mamandyqtardy daıarlaý baǵdarlamasynda artyq pánder kóp, dep xabarlaıdy QazAqparat tilshisi.
«Bilim mınıstrligi bekitken oqý josparlaryn alyp qarasaq, ondaǵy oqý saǵattarynyń 33 paıyzy jalpy pánderdi qamtıdy. Endi, til, tarıx pen ádebıetti oqytýǵa bolady. Alaıda dánekerleýshi, ıa bolmasa, tońazytqysh qondyrǵylarynyń sheberine geografııa men bıologııany oqytýdyń qandaı qajettiligi bar? Ondaı pánder nan pisirýshi, kondıter, qurylysshy jáne taǵy basqa mamandyqtarǵa beriledi. Al tiginshilerge astronomııa pánin oqytylatyny qısynǵa múldem kelmeıdi. Osynyń ózi tıimsiz baǵdarlamanyń kórinisi bolsa kerek», - deıdi Ábsattarov.
Onyń oıynsha, Bilim jáne ǵylym mınıstrligi oqý baǵdarlamasyn jasaǵanda kóp oılanǵan joq. Mektep baǵdarlamasyn kásibı-texnıkalyq júıesine kóshire saldy.
«Sonda negizgi salmaq ustazdarǵa túsip tur. Al kásibı mamandardy daıarlaý jumysy nazardan tys qalyp otyr. Sosyn oqý saǵattarynyń 10 paıyzyn dene shynyqtyrýǵa berip qoıǵan. Budan bólek, jalpy gýmanıtarlyq pánder taǵy bar. Onda da dene shynyqtyrýdyń úlesi basym. Sonda biz kolledjderde kimder daıarlanady? Jumysshylar ma? Joq, álde sportshylar ma?», - dep atap kórsetti depýtat.
Al eki jyldyq oqýdan keıin kolledj túlekteri jumys taba almaı júredi. Kolledjderdiń basshylyǵy bolsa, áskerge ketken, dekretke shyqqan jáne ýaqytsha jumysqa turǵan túlekterdi «jumyspen qamtylǵan» dep esep bere salady. Al mınıstr Saǵadıevtiń sózine qaraǵanda, ondaı tájirıbe nátıjeli jumyspen qamtý sharalary aıasynda jalǵasa beredi.
«Jastardy eki jyl kolledjde ustap qaıtemiz. Ol jumysty alty-jeti aıdyń ishinde jumys berýshi kompanııalardyń oqý ortalyqtarynda atqaryp shyǵýǵa bolady. Olar bilimdi stendten emes, naqty óndiriste ala alady. Osyǵan baılanysty «Aqjol» alǵashqy jumys mamandyǵyn jumys berýshilerdiń oqý ortalyqtarynan alýdy usynady. Al bıýdjet aqshasyn soǵan baǵyttaýǵa bolady», - deıdi Ábsattarov.
Aıta keteıik, búgingi otyrysta depýtat Amanjan Jamalov QR Ulttyq bank tóraǵasy Danııar Aqyshevtiń atyna saýal joldap, blokcheın men krıptovalıýtalar boıynsha vedomstvoaralyq komıssııany qurýdy usyndy.
Kommýnıster dári-dármekterdiń arzandaıtynyna senbeımiz dedi.
Al depýtat Ertaev general Muxtarovqaqatań eskertý jasady.
