Kolledj stýdentteri úshin aqparattyq-kommýnıkatsııalyq tehnologııalar boıynsha olımpıada ótedi

Bilim jáne ǵylym mınıstrliginiń málimetinshe, olımpıadanyń negizgi maqsaty - aqparattyq tehnologııalar salasyndaǵy daryndy stýdentterdi anyqtaý, olardyń baǵdarlamalaýǵa degen qyzyǵýshylyǵyn damytý, stýdentterdiń kásibı qyzmet problemalaryna degen tanymdyq jáne ǵylymı-zertteýshilik qyzyǵýshylyqtaryn arttyrý, stýdenttik ǵylymı qoǵamdardyń, úıirmeler men fakýltatıvterdiń jumystaryn jandandyrý, stýdentterdiń shyǵarmashylyq qabiletterin, jasampazdyq oı-órisin damytý.

Olımpıadaǵa elimizdiń ár aımaqtarynan I-shi týrdyń jeńimpazdary -kolledj stýdentteri  qatysady.

Tálimdik sharaǵa qatysýshylardyń kelesi baǵyttar boıynsha jobalardy oryndaýyn qarastyrady: «Ekonomıka salasy, áleýmettik sala, ǵylym jáne bilim salalaryndaǵy AKT ınnovatsııalar», «Mádenıet, densaýlyq saqtaý, bıznes salalaryndaǵy AKT ınnovatsııalar», «Demalysqa arnalǵan AKT ınnovatsııalar», «Apparattyq-baǵdarlamalyq ınnovatsııalar, sonymen qatar, robotty tehnıkalyq qurylǵylar jáne baǵdarlamalaý».

І, ІІ, ІІІ oryn ıelengen Olımpıadanyń jeńimpazdary dıplomdarmen jáne Halyqaralyq aqparattyq tehnologııalar ýnıversıtetinde oqýǵa arnalǵan granttarmen marapattalady. Jobalarǵa qosymsha júldelik nomınatsııalar belgilengen, olar dıplomdarmen jáne jeńildiktermen marapattalady (Halyqaralyq aqparattyq tehnologııalar ýnıversıtetinde oqýǵa 25%-tik jeńildik).

Olımpıadany Qazaqstan Respýblıkasynyń Bilim jáne ǵylym mınıstrligi, Qazaqstan Respýblıkasynyń Kólik jáne kommýnıkatsııa mınıstrligi, «Zerde» ulttyq ınfokommýnıkatsııalyq holdıngi» AQ jáne  Halyqaralyq aqparattyq tehnologııalar ýnıversıteti uıymdastyryp otyr.