Kolledj stýdentteri óz qolymen daıyndaǵan ónimin satyp, tabys taba alady

NUR-SULTAN. QazAqparat – Bilim jáne ǵylym mınıstri Ashat Aımaǵambetov bilim berý máseleleri boıynsha zańnama tehnıkalyq jáne kásiptik bilim berý deńgeıin qalaı qamtyǵanyn aıtyp berdi, dep habarlaıdy QazAqparat.

Mınıstr Facebook paraqshasynda zańǵa engizilgen ózgeristerge saı, tehnıkalyq jáne kásiptik bilim berý júıesine mynadaı tártip engizilgenin jazdy.

1. Endi stýdentterdiń dýaldy júıesi arqyly bilim alǵan merzimi eńbek ótili retinde esepteledi. Bul kolledj túlekteriniń jumysqa aıtarlyqtaı tájirıbemen ornalasý múmkindigin arttyrady.

2. Bekitilgen zańnamaǵa sáıkes ýákiletti organnyń kolledjderde oqý merzimderin belgileýi týraly norma alynyp tastaldy. Buǵan deıin biz ár biliktilikter boıynsha bilim alý merzimderin qatań bekitetinbiz. Ortasha eseppen alǵanda, oqý merzimi 2 jyldan 3 jyl 10 aıǵa deıin jalǵasatyn. Endi oqý uzaqtyǵy naqty bilim berý baǵdarlamasyna jáne qajetti oqý nátıjelerine baılanysty bolady. Jańa ózgeristerge sáıkes kolledjder jumys berýshilermen kelise otyryp, kásiptik standarttar nemese naryq talaptary negizinde bilim berý baǵdarlamalaryn ázirleıdi. Keıin ony QR BǴM baǵdarlamalarynyń tizilimine qosyp, soǵan baılanysty kadrlar daıyndaıdy.

3. Kolledj ókilderi kótergen taǵy bir másele sheshimin tapty. Endi kolledjder aqyly negizde qyzmet kórsetip, oqý-óndiristik sheberhanalarda, sharýashylyqtarda, oqý polıgondarynda daıyndaǵan taýarlaryn sata alady. Máselen, «Dánekerleý isi» mamandyǵy boıynsha oqıtyn stýdentter praktıka kezinde temirden sapaly konstrýktsııalar jasaıdy, jas kondıterler keremet ónimder pisiredi, qolóner baǵytyndaǵy mamandyqtary boıynsha oqıtyn stýdentter kıizden, keramıkadan, aǵashtan, bylǵarydan, zergerlik buıymdardan avtorlyq buıymdar daıyndaıdy. Biraq onyń bárin sata almaıtyn.

4. Qazirgi ýaqytta joǵary oqý oryndaryna qarasty biraz kolledjder jumys isteıdi, biraq qoldanystaǵy zańnamaǵa sáıkes ol oqý oryndary bıýdjet esebinen kadrlardy daıarlaý úshin memlekettik tapsyrys ala almaıdy. Jańa túzetýlerge sáıkes bul másele oń sheshimin tapty.

5. Memlekettik tapsyrysty alý úshin kolledjderdiń akkredıtteýden ótýine qatysty talaptar alynyp tastaldy.

«Tehnıkalyq jáne kásiptik bilim berý (TjKB) júıesi bolashaq mamandardy neǵurlym ıkemdi, beıimdelgish, tıimdi etip jáne jumys oryndarynda talap etiletin quzyretterdi barynsha úıretýge daǵdylanýy tıis», - deıdi Ashat Aımaǵambetov.