Kolledj stýdentteri durys tamaqtanbaıdy - depýtattar
ASTANA. QazAqparat - Parlament Májilisiniń bir top depýtattary kásibı-tehnıkalyq bilim baǵdarlamasyn qarjylandyrý kólemin arttyrýdy usyndy. Osyǵan oraı, olar QR Premer-Mınıstriniń orynbasary Erbolat Dosaevqa depýtattyq saýal joldady, dep habarlaıdy QazAqparat tilshisi.
Depýtat Káribaı Musyrmannyń aıtýynsha, jyldyń basynda óńirlerdi aralaý kezinde kásibı-tehnıkalyq oqý oryndarynyń ujymdary qarjy tapshylyǵy máselesin kóterdi. «Birinshiden, kolledjderge nátıjeli jumyspen qamtý men jappaı kásipkerlikti damytý baǵdarlamasy aıasynda bólingen qarajat jetkiliksiz. Sebebi bir stýdentke aı saıyn bólinetin 32 831 teńgeden mindetti ystyq tamaqqa jumsalatyn 13 450 teńgeni alyp tastaǵanda oqytý shyǵyndary úshin nebári 19 381 teńge qalady. Al bul soma 32 800 teńgeden kem bolmaýy tıis. Ekinshiden, nátıjeli jumyspen qamtý baǵdarlamasy boıynsha árbir stýdenttiń tamaqtanýyna bólingen 13 450 teńge, nemese árbir kúnge shaqqanda 538 teńge azdyq etetini anyq. 2012 jyly eseptelip bekitilgen bul somaǵa sodan beri eshqandaı ındeksteý júrgizilmegen. Qazir ol aıyna keminde 18 300 teńge nemese árbir kúnge shaqqanda 735 teńge bolýǵa tıis», - dep atap kórsetti K.Musyrman.
Onyń aıtýynsha, búginde nátıjeli jumyspen qamtý baǵdarlamasy aıasyna tegin bilim alyp júrgen stýdentterge shákirtaqy oqý úlgerimine qaramaı tólenedi. Kolledj ustazdary olarǵa grant ıegerlerimen birdeı talap qoıý qajet dep sanaıdy.
Aıta keteıik, otyrys kezinde depýtat Balaıym Kesebaeva Qyzylorda men Qostanaı oblystarynda ýaqytty ózgertý máselesin kóterdi. Sebebi qazirgi ýaqyttyń tártibi xalyqtyń densaýlyǵyna keri áserin tıgizip otyr. Al general depýtattar áýejaılardyń jeke menshikke berilýine alańdap otyr.
