Kolledj stýdentteri arasyndaǵy WorldSkills Shymkent chempıonaty bastaldy

ShYMKENT. QazAqparat - Shymkentte kolledj stýdentteriniń WorldSkills Shymkent -2019 kásiptik chempıonaty bastaldy. Jastar resýrstyq ortalyǵynda ótken sharaǵa 9 tehnıkalyq jáne kásiptik bilim berý mekemesinen 85 stýdent qatysty, dep habarlaıdy QazAqparat tilshisi.

Qoǵamda jumysshy mamandyǵyn dáripteý men bedelin arttyrý maqsatynda uıymdastyrylǵan jarysqa qatysýshylar 26 kásip boıynsha synǵa tústi. Jas mamandardyń kásibı biliktiligin arttyrýǵa baǵyttalǵan jobaǵa negizinen 18-22 jas aralyǵyndaǵy jastar qatysyp, úsh kún boıy sheberlikterin baıqatady. Olar aqparattyq tehnologııa, qurylys, kondıterlik, mektepke deıingi tárbıe, kıim dızaıny, shashtaraz, meıramhana bıznesi jáne taǵy basqa mamandyqtar boıynsha óz daıyndyǵyn kórsetedi.

Chempıonattyń ashylý saltanynda sóz alǵan «Kásipqor» holdınginiń menedjeri ári álemdik tehnıkalyq sarapshy Ernur Omarov jastardy jumysshy mamandyqty ıgerýge shaqyryp, kásiptik jáne tehnıkalyq bilim berý máselesi únemi baqylaýda bolatynyn aıtyp ótti. Sonymen qatar, aldaǵy ýaqytta kolledj stýdentterin qoldaý maqsatynda bıznes-semınarlar, trenıngter, sheberlik sabaqtary ótkizilip, kásipkerlikpen aınalysqy keletin túlekterge qoldaý kórsetiletinin jetkizdi.


Al chempıonatty uıymdastyrýshylar bolsa, «World Skills Kazakhstan» baıqaýy stýdentterdiń kásiptik-tehnıkalyq bilim berý júıesine degen qyzyǵýshylyǵyn arttyratynyna senimdi. Aımaqtyq baıqaýda jeńimpaz atanǵan stýdentter qazan aıynda Nur-Sultan qalasynda ótetin respýblıkalyq ulttyq chempıonatqa joldama alady.