Kolledj stýdentteri álemniń 152 memleketinde tanylǵan sertıfıkat ala alady

ASTANA. KAZINFORM - Jumysshy mamandyqtary jyly aıasynda tehnıkalyq jáne kásiptik bilim alýshylardyń kásibı daǵdylaryn tanýdyń jańa quraly engizilýde, dep habarlaıdy QR Oqý-aǵartý mınıstrliginiń baspasóz qyzmeti.

Halyqaralyq sertıfıkattaý júıesi Certiport platformasy negizinde iske qosylyp, qazirgi tańda pılottyq rejımde elimizdiń bes kolledjinde qoljetimdi. Qazaqstandaǵy alǵashqy resmı testileý ortalyǵy (CATC) «Talap» KEAQ bazasynda ashyldy.

Certiport — bul tsıfrlyq tehnologııalar men keńse baǵdarlamalary salasynda kásibı sertıfıkattaýǵa baǵyttalǵan halyqaralyq platforma. Ol bilim berý salasyndaǵy álemdik kóshbasshylardyń biri — Ulybrıtanııalyq Pearson kompanııasynyń quramyna kiredi.

Certiport sertıfıkattary álemniń 152 elinde tanylǵan, olardyń qatarynda — AQSh, Kanada, Eýropa, Azııa, Avstralııa jáne Taıaý Shyǵys elderi bar.

Bul qazaqstandyq kolledj stýdentteriniń óz daǵdylaryn halyqaralyq standarttar boıynsha dáleldep, sheteldik jumys berýshiler tarapynan tanylýyna, shetelde taǵylymdamadan ótip, jumys tabýda artyqshylyqqa ıe bolýyna jáne jahandyq eńbek naryǵyna shyǵýyna múmkindik beredi.

«Qazirgi tańda kolledj túlekterine tek dıplom emes, naqty daǵdylaryn rastaýy da qajet bolýda. Halyqaralyq sertıfıkattaý olarǵa Qazaqstanda da, shetelde de jańa mansaptyq múmkindikter ashady», — dedi QR Oqý-aǵartý mınıstrliginiń tehnıkalyq jáne kásiptik bilim berý departamentiniń dırektory Áset Muhanbetov.

Atalǵan emtıhan sessııasy ASTANA POLYTECHNIC joǵarǵy kolledji bazasynda ótti. Nátıjesinde tórt stýdent óz kásibı quzyretterin rastap, halyqaralyq sertıfıkattarǵa ıe boldy. Olardyń qatarynda kıberqaýipsizdik salasyndaǵy IT-mamandar: Dmıtrıı Karpıýk, Arsenıı Tsyplakov, Rashıd Hısmatýllın, sondaı-aq JavaScript boıynsha IT-maman — Ádemi Qabdolla bar.

Osyǵan deıin bilim berý júıesine jasandy ıntellekt quraldaryn engizýdiń ulttyq saıasaty ázirlenetini týraly jazdyq.