Kolledj stýdentteri «aqyldy jylyjaı» prototıpin oılap tapty

ASTANA. KAZINFORM – Almaty qurylys-tehnıkalyq kolledjiniń 3 kýrs stýdentteri Ǵabbas Baıazıtov, Georgıı Shıkın, Nazım Alıev avtomattandyrý úderisteri, sensorlyq baqylaý jáne jasandy ıntellekt elementteri biriktirilgen «aqyldy jylyjaı» prototıpin oılap tapty. Bul týraly Oqý-aǵartý mınıstrliginiń baspasóz qyzmeti habarlady. 

IoT qurylǵylary men baǵdarlamalyq jasaqtamanyń ıntegratsııasynyń arqasynda jylyjaı mıkroklımatty, jaryqtandyrý men sýarýdy ózdiginen retteı alady. Joba ósimdikterdi ósirý tıimdiligin arttyrýǵa jáne ony kútip-baptaýǵa adamnyń aralasýyn barynsha azaıtýǵa baǵyttalǵan.

Aıta ketý kerek, jasandy ıntellektini paıdalaný derekterdi taldaýǵa, ósimdikterdiń qajettilikterin boljaýǵa jáne jaǵdaılardy naqty ýaqytta beıimdeýge múmkindik beredi.

— Bul joba stýdentterdiń ınnovatsııaǵa degen umtylysynyń nátıjesi. Óndiristik oqytý sheberleriniń jetekshiligimen stýdentter ózderiniń tehnıkalyq daıarlyqtary men ınjenerlik oılaý qabiletteriniń joǵary deńgeıin kórsetti. Jobany jasaý barysynda olar mundaı júıege degen suranysty taldap, agrotehnıka men tsıfrlandyrý salasyndaǵy zamanaýı tehnologııalardy zerttep, jylyjaıdyń jumysyn ońtaılandyrý úshin mashınalyq oqytý algorıtmderin engizdi, — deıdi joba jetekshisi Shernııaz Kabdýshev.

Energoúnemdilik pen júıeniń turaqtylyǵyna erekshe mán berligen, jylyjaı kún panelderimen jabdyqtalǵan, al baǵdarlamalyq qamtamasyz etý júıesi ınternetke shekteýli qoljetimdilik jaǵdaıynda da jumys isteı alatyndaı etip jasalǵan.

Stýdentter jobany odan ári damytýdy josparlap otyr. Aldaǵy ýaqytta qashyqtyqtan baqylaýǵa arnalǵan mobıldi qosymsha jasap, sensorlyq júıeniń fýnktsıonalyn keńeıtý kózdelip otyr.

Aıta ketelik kolledjde jasandy ıntellekt zerthanasy ashylatyny týraly jazǵan edik.