Kolledj stýdenti: Vırýstan ózimdi jáne jaqyndarymdy qorǵaý úshin ekpe aldym

SEMEI. QazAqparat – Semeıdegi D.Qalmataev atyndaǵy memlekettik joǵary medıtsınalyq kolledjinde oqıtyn Krıstına Glýshko ne sebepti vaktsına saldyrǵanyn aıtyp berdi, dep habarlaıdy QazAqparat tilshisi.

Semeıde «Pfizer» vaktsınasyn saldyrý naýqany júrgizilýde. Ekpeni 12-18 jas aralyǵyndaǵy oqýshylar men stýdentter, júkti jáne bala emizetin áıelder alyp jatyr. Olardyń qatarynda D.Qalmataev atyndaǵy memlekettik joǵary medıtsınalyq kolledjiniń stýdenti Krıstına Glýshko bar.

«Men óz erkimmen vaktsına saldyrý jaıly sheshim qabyldadym. Árıne, ata-anamnyń ruqsatyn aldym. Bolashaq medıtsına qyzmetkeri retinde ózime júktelgen jaýapkershilikti sezindim. Jaqyn jandarymnyń jáne jerlesterimniń ómirine qaýip tóndirgim kelmeıdi. Vaktsına bizge ujymdyq ımmýnıtetti qalyptastyrýǵa jáne koronavırýstan qorǵanýǵa múmkindik beredi», – deıdi ol.

Kolledj dırektorynyń oqý-óndiristik jumys jónindegi orynbasary Aıda Ýlbaýovanyń aıtýynsha, ekpe saldyrýǵa nıet bildirip jatqan stýdentter sany artyp keledi.

«Stýdenttermen synyp saǵattary, ata-analarmen jınalystar ótkizilip, túsindirý jumystaryn júrgizdik. Ata-analar óz kelisimderin berip, stýdentter vaktsına saldyrýdy bastap ketti. Kámeletke tolmaǵan balalar úshin bul óte mańyzdy. Óıtkeni vaktsına alǵannan keıin ımmýnıtet kúsheıedi. Bizdegi eńbek ujymy da túgeldeı ekpe saldyrǵan», - deıdi ol.