Kolledj oqytýshylaryna ústemaqy tólenedi - Erlan Saǵadıev
ASTANA. QazAqparat - Kolledj oqytýshylary mektep muǵalimderi sııaqty attestatsııadan ótetin bolady. Sonyń nátıjesi boıynsha ústemaqy tólenedi, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, 2020 jylǵa qaraı ulttyq biliktilik testi ázirlenedi. Búginde ondaı júıe orta bilim salasynda mektep muǵalimderi tapsyryp otyrady. Sonyń nátıjesi boıynsha ústemaqy alady.
«2019 jyly biz test tapsyrlamalary men ústemaqy tóleý júıesin ázirleımiz. Sóıtip, kásiptik-texnıkalyq bilim salasynyń oqytýshylary da biliktilik sanatyna qaraı jalaqy alady», - dedi E.Saǵadıev Tamyz konferentsııasynyń plenarlyq májilisinde.
Aıta keteıik, kelesi jyldan bastap kolledjderdiń reıtıngisi jasalady. Soǵan qaraı árbir kolledjdiń oqý baǵdarlamasy da, memlekettik tapsyrystyń kólemi de ózgeretin bolady. Atalǵan reıtıng kolledj túlekteriniń jumysqa turý kórsetkishine negizdeledi. Eger belgili bir kolledjdiń kórsetkishi tómen bolsa, onda ol baǵytta maman daıarlaý toqtatylady.
«Qazirdiń ózinde kásibı-texnıkalyq bilim salasynda bir-bir qaıtalaıtyn jáne eshbir suranysy joq 109 mamandyq qysqartyldy. Sonyń nátıjesinde 66 kolledjdiń salalyq baǵyty ózgerdi. Al 20 oqý orny bir-birine qosyldy. Osy saladaǵy jumys jalǵasa beredi. Biz jas mamandardyń jumysqa turý kórsetkishine basa nazar aýdaramyz. Mamandyqqa durys úıretpese, túlekter jumysqa tura almasa, ol mamandyqtyń lıtsenzııasyn keri qaıtaramyz», - dep atap kórsetti E.Saǵadıev.
