Kolledj oqytýshylary jasandy ıntellekt quraldaryn meńgere bastady

ASTANA. KAZINFORM — Astana qalasynda tehnıkalyq jáne kásiptik bilim berý júıesinde jasandy ıntellekt (AI) quraldaryn qoldanýǵa baǵyttalǵan jańa respýblıkalyq baǵdarlama jumysyn bastady. 

Atalǵan joba Oqý-aǵartý mınıstrliginiń «Talap» kommertsııalyq emes aktsıonerlik qoǵamy tarapynan seriktes kompanııalarymen júzege asyrylyp jatyr.

Baǵdarlama aıasynda elordada «Bilim berý úderisindegi jasandy ıntellekt quraldary: oqytý tıimdiligin arttyrý» taqyrybynda tegin biliktilikti arttyrý kýrstarynyń resmı ashylýy ótti. Bastama IT salasynyń mamany emes kolledj oqytýshylaryna arnalǵan jáne Astana qalasyn, sondaı-aq Aqmola men Qaraǵandy oblystaryn qamtıdy.

Jobanyń negizgi maqsaty — pedagogterdiń tsıfrlyq jáne tehnologııalyq quzyretterin damytý, sondaı-aq jasandy ıntellekt quraldaryn oqý protsesinde tıimdi qoldanýǵa úıretý. Oqý baǵdarlamasy 10 aptaǵa josparlanǵan jáne gıbrıdti formatta ótedi. Qatysýshylar zamanaýı vırtýaldy platformalar arqyly teorııalyq bilimdi tájirıbemen ushtastyryp, praktıkalyq daǵdylaryn jetildiredi.

Baǵdarlamanyń basty ereksheligi — onyń praktıkalyq baǵyttylyǵy. Tyńdaýshylar álemniń jetekshi ýnıversıtetterinde bilim alǵan sarapshylardyń dáristerin tyńdap, halyqaralyq tehnologııalyq kompanııalar ókilderimen tájirıbe almasý múmkindigine ıe bolady.

Qorytyndy kezeńde bilim berý men bıznes salasyna arnalǵan AI-jobalardy ázirleýge baǵyttalǵan Hackathon Battle uıymdastyrylady.
Oqýdy sátti aıaqtap, óz jobalaryn qorǵaǵan qatysýshylarǵa «Talap» KEAQ-tyń resmı sertıfıkattary tabystalady.

Aıta ketelik mektepter men kolledjderde «DosbolLIKE» antıbýllıngtik baǵdarlamasy júzege asyrylyp jatqany týraly jazǵan edik.