Kolledj oqytýshylary shetelde biliktiligin arttyrady – mınıstr
ASTANA. KAZINFORM – Qazaqstandaǵy kolledjderde 42,9 myń pedagog jumys isteıdi jáne áli de 2 myńnan astam maman jetispeıdi. Bul týraly Oqý-aǵartý mınıstri Juldyz Súleımenova Úkimet otyrysynda aıtty.
Mınıstrdiń aıtýynsha, kolledjderde jumys isteıtin 42 901 pedagogtyń 40 myńnan astamy (95,4%) joǵary bilimdi.
Olardyń basym bóligin 16 248 arnaıy pán oqytýshysy, 9 505 jalpy bilim beretin pán oqytýshysy jáne 4 880 óndiristik oqytý sheberi quraıdy.
Kolledjderdegi kadr tapshylyǵyn azaıtý úshin óndiriste jumys istegen mamandardy bilim berý salasyna tartý da qolǵa alynǵan. Osylaısha óndiristen 1 934 maman pedagogtik qyzmetke kelgen. Degenmen, el boıynsha kolledjderge áli de 2 093 pedagog qajet.
– Pedagogterdiń kásibı deńgeıin arttyrý jumysy jalǵasady. 9 245 pedagog biliktilikti arttyrý kýrstarynan ótti, 17 487 pedagog tsıfrlyq tehnologııalar men jasandy ıntellektini oqý protsesinde qoldaný boıynsha daıarlandy, 132 pedagog sheteldik taǵylymdamadan ótti, – dedi J. Súleımenova.
Kelesi kezeńde pedagogterdi halyqaralyq ádistemeler (BOPPPS, TBLT) boıynsha daıarlaý, salalyq standarttarmen sertıfıkattaý, ozyq kásiporyndarda taǵylymdamadan ótkizý jáne tálimgerlik arqyly Hard & Soft skills daǵdylaryn damytý júzege asyrylyp jatyr.
– Halyqaralyq biliktiligin rastaǵan pedagogter úshin attestattaý rásimin jeńildetý qarastyrylyp jatyr, – dedi Oqý-aǵartý mınıstri.
Buǵan deıin J. Súleımenova Qazaqstan kolledjderinen 32 mamandyq alynyp tastalýy múmkin ekenin aıtqan edi.
Olardyń ornyna 20 jańa mamandyq paıda bolady.
Al 2035 jyly 1,8 mln jumysshy mamanǵa suranys bolady.
