Kolledj emtıxandary tikeleı efır arqyly kórsetiledi
Astana qalalyq departamentiniń basshysy Jazıra Jylqyshıevanyń aıtýynsha, respýblıka boıynsha kolledjderge myńdaǵan granttar bólindi. Endi, osy memlekettik tapsyrysty ashyq taratýdy iske asyrý qajet.
"Aldaǵy ýaqytta emtıxandar bolady. Agenttik ókilderi de qabyldaý komıssııasynyń quramyna kirýge nıet bildirdi. 20 tamyzdan keıin emtıxan qorytyndysy shyǵady. Sonyń nátıjesi boıynsha granttar úmitkerler arasynda taratylady. Sol kezde biz taǵy bir sharany ótkizip, naqty bir kolledjdiń úlgisinde granttardyń qalaısha taratylǵanyn jarııalaımyz. Osy jumysqa Kásipodaqtar federatsııasy da atsalysamyz deıdi. Negizi, kolledjder qarsy emes", - dedi J.Jylqyshıeva jýrnalısterge bergen suxbatynda.
Onyń aıtýynsha, kolledjder emtıxan kezinde onlaın translıatsııany uıymdastyrýǵa kelisti. Ol úshin foıelerde teledıdarlar ornatylady. Osynyń arqasynda kez kelgen adam emtıxandardy tikeleı efırde kóre alady.
"Sosyn biz Feısbýk pen Instagram sııaqty áleýmettik jeliler arqyly onlaın translıatsııa jasaýdy da usyndyq. Osylaısha, emtıxandardy ashyq túrde ótkizýge bolady. Bizdiń balalarymyz kolledjge ádil jolmen túsýi tıis", - dep atap kórsetti J.Jylqyshıeva.
Aıta keteıik, sybaılas jemqorlyqqa qarsy saıasat departamentiniń dırektory Danııar Sabyrbaevtyń aıtýynsha, búginde osy salada jyldar boıy qalyptasqan "sxemalar" bar. Ony oqý oryndarynyń basshylyǵy da, jergilikti bılik te ózgertkisi kelmeıdi.
"Negizi, kolledj granttaryn taratý boıynsha suraqtar kóp. Nege bir mamandyqqa grant az beriledi de, suranysy tómen mamandyqtarǵa, kerisinshe, kóp bólinedi? Mysaly, baılanysshy, radıst sııaqty mamandyqtarǵa biraz granttar beriledi. Al qonaq úı bıznesi boıynsha tym az. Sosyn kolledjder testterdi ózderi daıyndaıdy, ózderi ótkizedi, úmitkerlermen de ózderi jeke kezdesedi. Sóıtip, granttardy da óz betinshe taratady. Bylaısha aıtqanda, grant kolledjge tústi me, boldy. Ony qalaı jáne kimge berip jatyr? Ol jaǵyn eshkim bilmeıdi", - dedi D.Sabyrbaev.